Gaites, grupos de baille y conciertos folk enllenen Xixón de tradición esta selmana

Esti domingu 7 d’agostu arranquen les fiestes de Xixón y, dientro de la programación estival de la villa de Xovellanos, hai nesta selmana tres eventos nos que la música tradicional garra’l protagonismu: el XXII Festival Internacional de Gaites Villa de Xixón del 3 al 7 d’agostu; el Festival Folclóricu del 3 al 5 d’agostu y el Día d’Asturies en Xixón el 7 d’agostu.

El Festival Internacional de Gaites entama esti miércoles 3 a les 20h na Plaza la República d’El Coto cola actuación de Burbús, formación de música tradicional renovada. Bandes escoceses (Cambridgeshire Caledonian Pipe Band), irlandeses (North Coast Dance Company), gallegues (Agarimo de Catabois) y catalanes (Sons de la Cossetània), van participar nesti festival que va tener una folixa el sábadu 6 nel Muséu del Pueblu d’Asturies en Xixón. Va tar animada por la formación catalana ente les 12 y les 19h y nella va haber tamién un taller de baille a les 17h con Pau Santirso y los conciertos de les pandereteres 6 Riales y el tríu astur-andaluz Deira. Una gala con toles bandes de gaites participantes, el domingu 7 a les 22h na Plaza Mayor, pon el ramu a la ventidós edición d’esti festival.

Tamién el día 3 entama’l Festival Folclóricu de Xixón nel que durante tres díes actuen na Plaza Mayor a les 22h agrupaciones de dientro y fuera d’Asturies. Representando al país van tar el Grupu Folclóricu Trebeyu (miércoles 3), el Grupu Folclóricu Xolgoriu (xueves 4) y l’Asociación Coros y Danzas Jovellanos (vienres 5). L’arranque del festival ta precedíu’l miércoles 3 a les 18h pol XL Concursu de Canción Asturiana qu’entama’l diariu El Comercio na Plaza Mayor.

Toes estes actividaes sirven pa calentar l’entamu de la Semanona de Xixón el domingu 7 d’agostu. A les 21h ye’l pregón na Plaza l’Ayuntamientu nel que van participar enriba l’escenariu 13 agrupaciones folclóriques y músicos tradicionales. Pero dende pela mañana la tradición va percorrer les cais d’esta villa gracies al Desfile Tradicional del Día d’Asturies en Xixón que va a les 12h dende la Plaza Mayor hasta L’Atalaya y a la Danza Prima que, ente otres actividaes, va baillase nesti espaciu de Cimavilla.

Mercar discos folk, celta y de gaita na tienda online