«La llucha nun acaba equí». Con esi mensaxe el Grupu de Sofitu del casu La Suiza entama una «Xuntanza antirrepresiva» el domingu 21 de xunu nel polideportivu de Cimavilla (Xixón) cola que celebrar la llibertá de les seis sindicalistes encarcelaes pol conflictu na panadería La Suiza y caltener encesa la llama de la solidaridá coles lluches populares. Nesta xornada, la música n’asturianu va tener muncho protagonismu coles actuaciones d’Ambás ya Ramsés, Coru Al Altu La Lleva, Asturtralla, Nun Tamos Toes, Avante’l Pueblu DJ y otros artistes.
La xornada va durar de doce del mediudía a nueve la nueche con una programación na qu’hai intervenciones de dalgunes de les condergaes nel casu de La Suiza y de les sos families, d’organizaciones sindicales, un alderique dedicáu a casos de represión sindical y otres actividaes.
La estaya musical entama pela mañana, a les 12.30h, cola actuación d‘Ambás ya Ramsés y el Coru Al Altu La Lleva a les 13h. Yá pela tarde, de 14h a 16h, van tocar delles Nun Tamos Toes y va facer una esbilla musical -na que ta presente la música’l país- DJ Avante’l Pueblu. La última de les actuaciones de música n’asturianu ye a les 20h y nella van participar Asturtralla interpretando’l tema ‘Les 6 de La Suiza’ y varios de los artistes que punxeron voz al cantar colectivu ‘Nun Ye Delitu‘. Tamién van participar otros proyectos musicalesd’Asturies: Aníbal Menchaca, Bad Step DJ’s y La Historia del Ska con Josele Skansino con Rafa Tyger.
Con esta xornada vuelve amosase que «la cultura tamién ye una ferramienta de resistencia», como recueye’l grupu de sofitu a les 6 de La Suiza na publicación que fixeron en redes sociales. Amás, anuncien que nos próximos díes van dar más detalles de la programación.
Suscríbite a les nuestres novedaes
