«Hai que crear el sentíu de comunidá alredor del país y les sos llingües y cultura»

Xune Elipe lleva toa una vida venceyáu a la música de manera práctica y también teórica; miembru fundador de Dixebra con quien tien grabao una quincena de discos y de Soncai System con dos álbumes editaos. Na segunda estaya, na teórica, cuenta con una serie d’obres bibliográfiques que traten diversos aspectos musicales: Llingua y rock (1996) sobre l’orixe de la escena rockera n’asturianu y les bandes que llantaron la semiente d’ella, Rockmería. Un repasu a la música popular del sieglu XX (2014), onde analiza dellos estilos sonoros que van más allá de lo estrictamente musical (social, política, cultural o llingüísticamente) o Hai una llinia trazada. Historia de la música asturiana (Premiu Máximo Fuertes Acevedo d’Ensayu, 2022), na que repasa la trayectoria de la música del país dende los sos anicios hasta l’actualidá.

Ta acabante de publicar l’ensayu ganador del II Premiu Yolanda Huergo, convocáu pola Asociación Grana, un testu que lleva por títulu Da-yos caña. El tiempu y el contestu d’una banda de Rock Astur (Trabe, 2026). Con ella sigue enanchando la so obra teórica alredor de la música como ferramienta de comunicación y d’intervención social; un trabayu col que conocer los fechos y les circunstancies fundamentales pa entender dafechu a una banda como Dixebra, pero también pa saber por qué la sociedá asturiana actual ye como ye y cuálos son los acontecimientos que foron moldiándola. Pa conocer más d’ello charramos con Xune.

¿Qué supón pa ti ganar esti premiu?

Ye dalgo que tien un componente íntimu bultable, Yolanda yera una bona amiga y guardo na memoria los munchos años de rellación con ella. Foi y ye un referente del activismu n’Asturies, la so vida ye un exemplu de compromisu con milenta causes —asturianismu, feminismu, ecoloxismu, derechos humanos—. Qu’una obra mía vaya asociada al so nome préstame abondo y ye un honor.

Nel testu utilices a Dixebra pa contar otres munches coses…

Eso ye, emplego al grupu pa narrar y esplicar unos fechos y acontecimientos que foron, podríemos dicir, fundacionales de la sociedá asturiana actual. Socedíos que-y foron dando forma hasta componer les característiques que tien anguaño. L’Asturies de güei nun s’entiende ensin les tresformaciones qu’esperimentó nes últimes cuatro décades. Nesti sen, la mal llamada reconversión industrial (en realidá foi un esmantelamientu en toa regla), les lluches obreres como consecuencia d’ella, los movimientos sociales como’l de la insumisión al serviciu militar, el surdimientu del asturianismu modernu, el procesu de normativización llingüísticu… son cuestiones centrales a la d’esplicar los porqués de la singularidá de la sociedá asturiana d’agora.

«Quixi facer un testu de llectura fácil y rápida, como un trallazu punk de tres minutos nos que se concentra un mensaxe directu. Condenso nun cientu páxines cuatro décades d’historia social d’Asturies y de Dixebra, voi al granu y a lo esencial»

Al empar, vas amosando cómo too ello tien reflexu na ideoloxía, les lletres y el mensaxe de Dixebra.

Sí, suel dicise que Dixebra ye más qu’un grupu musical. En dalguna ocasión definieron a la banda como xuglares contemporáneos, refiriéndose a que les nuestres lletres yeren l’espeyu musical de la realidá asturiana. Siempre digo qu’al traviés de los nuestros discos puede conocese y esplicase la historia de l’Asturies contemporánea, Dixebra ta intrínsicamente venceyada a ella. 

Como les tos obres anteriores, ésta tamién tien esi calter pedagóxicu y divulgativu que les caracteriza.

Cuando me punxi con ella tenía claro que’l camín a siguir yera esi. Quixi facer un testu de llectura fácil y rápida, como un trallazu punk de tres minutos nos que se concentra un mensaxe directu. Condenso nun cientu páxines cuatro décades d’historia social d’Asturies y de Dixebra, voi al granu y a lo esencial. Ún de los oxetivos ye que la mocedá a la que-y preste’l grupu pueda conocer qué hai detrás d’él nel planu ideolóxicu. Y ye que munches veces, la xente que tenemos cierta edá, damos por fecho que se conocen determinaes cuestiones; pero aquellos y aquelles que nun les vivieron nun tienen porqué ser conscientes de lo que significaron. Un rapaz o una rapaza de venti años probablemente nun sepa qué foi la reconversión, cómo s’aprobó’l nuestru Estatutu d’Autonomía, en qué circunstancies se movió’l nacionalismu asturianu, qué ye un fancín… Nun quería que’l testu fuere un exerciciu de señardá vacíu, sinón una ferramienta pa que les xeneraciones más nueves pudieren saber en qué ámbitu tuviemos que desenvolver el nuestru compromisu militante les anteriores.

«Ún de los oxetivos ye que la mocedá a la que-y preste’l grupu pueda conocer qué hai detrás d’él nel planu ideolóxicu. Y ye que munches veces, la xente que tenemos cierta edá, damos por fecho que se conocen determinaes cuestiones; pero aquellos y aquelles que nun les vivieron nun tienen porqué ser conscientes de lo que significaron»

L’entretenimientu tien tamién un pesu importante.

Sí, sí, claro. Nes sos páxines hai temes más «académicos» o sesudos, como cuando falo del nacionalitarismu llibertariu, pero nel testu tán tamién presentes anécdotes de la banda o cuestiones biográfiques que creo dan el contrapuntu más llixeru y faen la llectura más áxil y fácil.

Musicalmente dexes bien claros los tos referentes.

Tampoco ye que descubra nada nuevo, quien escuche a Dixebra sabe per ónde vamos… Nacimos como una banda influyenciada pol punk, tanto no musical como nel funcionamientu, yá sabes, el failo tú mesmu, l’autoxestión. Col tiempu fuimos evolucionando y incorporando al nuestru soníu munchos otros matices, hasta iguar ún propiu y identificable. Nel llibru fálase del nacimientu del punk, pero también del ska, del reggae o del celtic-rock; ensin escaecer la influyencia que tuvo en nós el rock radical vascu o’l folk asturianu.

«La música ye un altavoz y un aglutinante fenomenal, cuando la xente coria ún de los nuestros cantares l’oxetivu ta algamáu. Creo que Dixebra contribuyimos a crear texíu de país, a construyir vínculos sentimentales con él»

Evolución musical, pero tamién lletrísticamente…

Nun primer momentu, los nuestros estribillos yeren como eslóganes glayaos nuna manifestación («Tolos pueblos col nome popular» ye un mui bon exemplu). Pasín ente pasu, quiximos dar mayor calter lliterariu a les lletres, una xera a la que contribuyeron abondo escritores como Xandru Fernández, Quique Faes o Francisco Álvarez. Con ellos deprendimos que puedes siguir llanzando mensaxes de rabia, de reivindicación, de movilización, de solidaridá, d’una manera distinta. 

L’añu que vien Dixebra cumple cuarenta años ¿qué balance faes?

Nun puede ser más positivu, qu’unos rapazos como los que tuviemos aquel día nel primer ensayu dieren orixe a un proyectu como Dixebra, col desarrollu que tuvo, ye como pa tar arguyosos. Siempre digo qu’hai que crear el sentíu de comunidá alredor del país y les sos llingües y cultura, y nesti sen la música xuega un papel primordial. Ésta ye un altavoz y un aglutinante fenomenal, cuando la xente coria ún de los nuestros cantares l’oxetivu ta algamáu. Creo que contribuyimos a crear texíu de país, a construyir vínculos sentimentales con él. En tou procesu comunitariu son imprescindibles referencies coles que s’identificar y la música ye un elementu bárbaru pa ello.