Muncho llovió desque Astutralla xubió per última vegada a un escenariu. Xixón acoyó hai trés décades la cabera actuación d’esta formación punk-rock. Tres del regresu que fixo’l grupu en 2021 a los estudios de grabación y al llocal d’ensayu, teníen una xera pendiente: volver actuar en directo. El sábadu 28 de marzu, a les 21.15h, con entrada de baldre y en La Traviesa de L’Infiestu, acaba la espera.
«Nun tien muncho xacíu tar grabando cantares, xubilos a Spotify y nun llevalos al directo», desplica Xelu Estébanez, cabezaleru d’Asturtralla, sobre una de les motivaciones del so regresu a los escenarios. Tamién sorraya qu’hai 30 años dexáronlo «ehí de mala manera» y que por eso «quedara pendiente» volver a tocar. Amás fáenlo pa «intentar pasalo de puta madre y ver cómo sale, cuánta xente va, si-yos presta…«. La idea que tienen ye dar llueu más actuaciones; de fechu, el cartelu del eventu pon nome a la xira: Ensayos con xente.
El conciertu va ser tamién la presentación del próximu EP que’l grupu va llanzar en marzu y que va titulase Roxos: fame y pioyos. Na actuación que van dar van sonar tolos sos temes xunto a tolos cantares que la banda foi asoleyando dende’l so regresu en 2021.
Asturtralla ye ún de los primeros grupos qu’hubo de punk-rock n’asturianu. Entamaron a ensayar en 1994 n’Avilés, grabaron un par de maquetes y participaron nel compilatoriu ‘Sáca-yos la Llingua‘ (1997, L’Aguañaz) colos cantares ‘Utopía Ciencia Ficción’ y ‘Na Zona Muerta’.
En 2021 regresaron asoleyando l’EP homónimu Asturtralla; al que siguió Grasa pal focicu (2023) y la publicación una serie de singles a lo llargo pasáu añu: les versiones ‘Asturies insumisa’ (‘Zapatista’, de Dixebra), ‘Nun somos nada’ de La Polla Records y ‘Ye un crimen’ d’Eskorbuto; y la composición propia ‘Les 6 de La Suiza’, cola collaboración de Reichel d’Ochobre y La Morgue y que voi votáu por los y les llectores de musicasturiana.com como’l décimu meyor cenciellu de 2025.
Suscríbite a les nuestres novedaes
