Del 6 al 8 d’ochobre Entaína Ribeseya entama una edición nueva de la Folixa la Sidre de Ribeseya y nella la música asturiana torna a tar bien presente. El sábadu 7 va ser el día protagonizáu polos sones del país gracies al VII Festival Villa de Ribeseya n’Alcordanza de Puru y Hugo -na que participen les bandes de gaites Noega, Ribeseya, El Gumial y l’Agrupación Folclórica Picos d’Europa-; al III Concursu de Gaiter@s Gelu Cuevo y a los conciertos de 6 Riales, La Tarrancha y Llan de Cubel. Tamién van sonar los sones del país na pinchada d’Avante’l Pueblu y el domingu 8 cola actuación de La Xarangana.
La música de raigañu va entamar a sonar a les 11 la mañana del sábadu col III Concursu de Gaiter@s Gelu Cuevo, entamáu en collaboración cola Escuela de Música de Ribeseya. Na carpa de la folixa -asitiada nel paséu del muelle- van participar los y les gaiteres que s’apuntaren enantes del 2 d’ochobre a una de les dos estayes: mayores y menores de 16 años. Ye lo que va preceder a la sesión vermú na qu’esi día van actuar na carpa de La Rula les pandereteres 6 Riales a les 14h. Al día siguiente, nel mesmu llugar y a les 13h, va ser el turnu de la bandina La Xarangana.
La tarde del sábadu celébrase’l VII Festival Villa de Ribeseya n’Alcordanza de Puru y Hugo. A les 18.15h entama’l baille nel puertu cola actuación de l’Agrupación Folclórica Picos d’Europa que va dar pasu, a les 18.15h a los pasacais de les bandes de gaites El Gumial (Ayer), Noega (Xixón) y l’anfitriona Ribeseya. Llueu, a les 19h, toles agrupaciones van actuar na carpa de La Rula.
Folk celta y rock n’asturianu
La xornada del sábadu 7 remata cola Nueche de Folixa. A les 22h va sonar enriba l’escenariu la carpa’l folk celta de Llan de Cubel, a la medianueche el mecigayu ska de La Tarrancha y a la 1.30h DJ Avante’l Pueblu, que va facer una esbilla de músiques d’Asturies y del mundu. Toles actividaes son de baldre y, amás de música n’asturianu, va haber otres actuaciones y pinchaes y una montonera actividaes pa tolos públicos rellacionaos cola sidra.
Suscríbite a les nuestres novedaes
