El Portal de Música ta acabante d’anunciar les llistes de los 100 álbumes más vendíos nel Estáu español y el Manual de Romería de Rodrigo Cuevas entra con fuercia nelles: puestu 9 na llista d’álbumes -que suma ventes en CD y reproducciones dixitales- y puestu 3 na de vinilos. Una perbona noticia pa la música n’asturianu, que nos últimos años namás algamó entrar nestes llistes oficiales ellaboraes por Promusicae (Productores de Música d’España) con Dixebra, cuando’l discu Uviéu 17-09-2017 aportó al puestu 88.
Manual de Romería ye l’esperáu segundu trabayu de llarga duración de Rodrigo Cuevas. L’axitador folclóricu, el rei del cortexu, el llabrador d’una Asturies diversa y arguyosa de la so identidá rural, l’animal escénicu, presenta 14 cantares enllenos de sensualidá y fuerza, de romería, d’electrónica retro, de folclore que tresciende a les llendes asturianes, de mensaxe disfrutón, costumista y comprometíu a la par; seya n’asturianu, en castellanu, n’amestáu o en francés.
El discu ta grabáu y producíu por Eduardo Cabra “Visitante”, músicu , compositor y productor de la pernomada banda puertoriqueña Calle 13. Y nél, Rodrigo Cuevas fai esi viaxe que tantes xeneraciones d’asturianos fixeron nel pasáu; dende l’Asturies rural hasta Llatinoamérica, faciendo d’enllaz ente les imprescindibles voces de la tradición que suenen nel trabayu –Mariluz Cristóbal Caunedo, Edelio González Fernández, Josefa Diebra Faúndez y Nieves Rodríguez Cañón– y los instrumentos y coros de músicos del otru llau de la mar, ente los que destaca la voz d’iLe -que tamién fuera vocalista de Calle 13- y instrumentos como’l cuatro venezolano, charango, roncoco o tres. Tamién tien el so protagonismu la veterana agrupación coral corsa A Filetta y José González “El Presi”, sampleáu nún de los temes.
Un álbum nel que Rodrigo Cuevas afítase como ún de los artistes cimeros de la so xeneración, tanto dientro como fuera d’Asturies, gracies a un proyectu interdisciplinar articuláu alredor de la música, pero onde lo perfomativo, lo representativo y lo audiovisual tamién son pegollos de la propuesta.
Suscríbite a les nuestres novedaes
