Diecisiete artistes qu’usen l’asturianu nes sos composiciones van tener presencia en dos convocatories d’ámbitu estatal: el circuitu musical en zones afectaes pola llamada «transición xusta» Dinamiz-ARTj, nel que van participar nesta edición Alienda, Slum Suit, La Bonturné, Llau, Algaire, Héctor Braga, Caldo y Os Rabizos, Deira, Los Gascones, 6 Riales y Cerezal; y la iniciativa Som València. Amás, la música’l país va tar presente tamién nel FIVO con Llevólu’l Sumiciu, Ferla Megía, Sastre & Al Altu la Lleva, Héctor Braga y Xera.
Ayer entamó la V edición del FIVO –Festival Internacional de Videoclips de Oviedo-, onde la producción asturiana tien un espaciu señaláu cola Sección Asturias. Esti sábadu 9 a les 18.30h nos Cines Embajadores Foncalada d’Uviéu van proyectase los trabayos audiovisuales de cinco artistes de música asturiana: «Divina» de Llevólu’l Sumiciu, «Xatu» de Ferla Megía, «Funeres S/N» de Sastre & Al Altu la Lleva -dirixíu por Daniela Cohen-, «Valiente» d’Héctor Braga ft. Víctor Manuel -dirixíu por Antonio Llaneza-, y «Corales de cristal» de Xera -obra de Carlos Díaz Sánchez-.
Per otru llau, güei ponse en marcha n’Asturies una nueva edición de Dinamiz-ARTj con Deira, que van actuar en Lluanco a les 19h, un programa incluyíu na Red Cultural del Instituto para la Transición Justa (ITJ) que nació col enfotu de xenerar una ufierta cultural amplia nos conceyos que s’enmarquen dientro de les llamaes «zones de transición xusta». Tres l’éxitu de les dos primeres ediciones dende la so implantación en 2022 -con más de 1.000 actuaciones de música, danza y teatru y más de 80.000 espectadores en más de 130 municipios del Estáu-, na que participaron delles formaciones asturianes; esti añu repiten Alienda, Slum Suit, La Bonturné, Llau, Algaire, Héctor Braga, Caldo y Os Rabizos, Deira, Los Gascones, 6 Riales y Cerezal.
Som València
Col envís de recaudar fondos pa les persones afectaes poles inundaciones de la DANA en València, el sector musical impulsó, en collaboración cola Fundació Horta Sud, la iniciativa Som València, pola que dellos artistes del Estáu tán actuando en sales de delles ciudaes dende la nueche d’ayer. N’Asturies, la cita va ser el próximu xueves 14 a les 20.30h n’Uviéu -Sala Tribeca- y va tener participación d’artistes de la escena musical n’asturianu: L-R y Marisa Valle Roso. Les entraes tienen un preciu de 15 € y pueden conseguise equí. Amás, hai una fila 0 disponible pa quienes nun puedan dir al eventu pero quieran sofitar la causa.
Suscríbite a les nuestres novedaes
