Yá hai más información del Premiu Obdulia Álvarez La Busdonga d’Asturianada: Isaac Sierra-Longo, Piedad García Guerra, Ainhoa García García, Raúl Díaz García, Cristina Sánchez Sánchez y Lucía Rojo son los seis primeros artistes que van subise al escenariu del Teatru Toreno de Cangas del Narcea esti domingu 10 de payares a les 12h na primer semifinal del premiu. La Conseyería de Cultura, Política Llingüística y Deporte convoca esta reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015.
Isaac Sierra-Longo. Natural de Viriu (Parres), empezó la so andadura nel mundu de la canción asturiana va más de 10 años, pero la so gran afición remóntase a cuando yera neñu. De la mano del so maestru y amigu Narciso Fernández Arduengo, formóse y llogró más de venti primeros puestos nos concursos principales del país.
Piedad García Guerra ye de Xixón y lleva tola vida vinculada al folclor y a la tradición musical d’Asturies pol influxu de la so familia, que siempre-y tresmitió respetu pola cultura del país. Nació nuna casa onde la gaita siempre tuvo presente, sobre manera na figura de so padre, y a ella dedicó bona parte de la so vida hasta que’l maestru gaiteru Armando Fernández descubrió nella dotes pa la interpretación vocal y animóla a trabayar y a formase col gran Ismael Tomás.
Ainhoa García García ye de Tinéu y tien 17 años. El so primer contactu cola canción asturiana foi va cinco años gracies a Ana, la so maestra de llingua asturiana. Averóse de la so mano a la canción vaqueirada y, d’entós p’acá, la so afición foi a más y lleva una temporada faciendo tables en dellos de los escenarios más renomaos de l’asturianada. Considera importante la formación vocal pa llabrar una carrera sólida que la lleve lloñe, tan lloñe como los sos referentes nel xéneru.
Raúl Díaz García llega como semifinalista dende la cuenca minera, dende L’Armendite (Samartín del Rei Aurelio). Fíu y nietu de grandes aficionaos a l’asturianada, siempre mostró interés pola canción tradicional. A los 10 o 11 años, cantó pela primer vez nuna actividá escolar y dexó ablucaos a tolos presentes, ente ellos a Arsenio Fernández-Nespral, componente del Cuartetu Torner, quien lu animó a trabayar la voz y a entamar una trayectoria artística que foi desenvoviendo baxo’l maxisteriu de Carlos Ronderos.
Cristina Sánchez Sánchez ye natural d’El Valle Baxu de Peñamellera, del pueblu de Cuñaba, y vien d’una familia de talentos nel ámbitu de la canción asturiana. Bisgüelos y güelos cantadores que marcaron una saga familiar na que rescampla la figura de la so tía María, «La pastorina del Cares» que tantos éxitos llogró. Empezó la so carrera artística nel añu 2012 de la mano d’Ismael Tomás na Escuela Cantu la Jorma de Suarías. Debuta en Ponga y dende entós son innumerables les veces que xubió al podiu de los concursos más importantes del país.
Lucía Rojo. La so trayectoria ta marcada pola figura del so bisgüelu Manuel, gran aficionáu a la canción asturiana y que güei, con 92 años, sigue siendo’l meyor críticu d’esta candasa de 22. Empieza la so andadura bien neña, con 9 años, y de siguío apúntase a los concursos pa facer tables y conocer el mundu de l’asturianada dende dientro. La figura de Mariceli Fernández foi perimportante na so formación como cantadora de tonada nos inicios y anguaño continúa perfeccionando la so técnica vocal na Escuela de Música de Candás baxo les directrices de David Colado.
Próximes semifinales
Les siguientes semifinales son el 15 de payares a les 19h nel Teatru Auditoriu de Siero y el 22 de payares a les 19h nel Teatru Nuevu de La Felguera, en Llangréu. El 29 de payares el Teatru de La Llaboral de Xixón va acoyer la gala final d’esti certame que va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años). Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.
Suscríbite a les nuestres novedaes
