La Taberna Narciso celebra esti mes el so aniversariu con música’l país

Foi en 2022 cuando’l perconocíu hosteleru y axitador cultural Jose Caja, reabrió la Taberna Narciso en Teberga, un «chigre-chigre» que nació en 1830 col nome de Casa Manolón. Nestos tres años esti llocal acoyó una montonera d’actividaes culturaes y, dientro d’elles, la música tuvo un papel cimeru. Pa festexalu, del 9 al 31 de mayu va haber siete actividaes ente les que s’inclúin varies actuaciones de música n’asturianu.

Concretamente actúen el tríu folk Picarós (vienres 9 a les 22.30h); la cantautora Vero Rubio con un alcuentru músico-lliterariu (xueves 22 a les 20h); Pau Santirso y María Vázquez col so baille y música tradicional (domingu 25 a les 13h) y Rollu Folk cola so música de raigañu (sábadu 31 con hora ensin confirmar). Toles actividaes son de baldre.