El Festival Internacional do Mundo Celta de Ortigueira ye l’eventu más importante del xéneru na Península Ibérica y dende va 25 años entama’l Concurso Runas pa grupos noveles. Tres de participar nes últimes ediciones grupos como Guieldu, Alienda y Picarós -que llegaron los tres a la final-, esti añu ye Entós la formación asturiana que foi escoyida semifinalista pol xuráu. Pa poder pasar a la fase final del concursu -na que van participar tres bandes- necesiten ganar la votación online abierta na web del festival.
Los tres finalistes van tocar dientro del festival el xueves 10 de xunetu de 2025. Quien gane nesa final, tien garantizáu un conciertu nel escenariu principal pa la edición de 2026 con un caché de 3.000 € (IVA incluyíu). Nesti certame yá participaron más de 200 bandes de dellos países, lo que fai del concursu ún de los más importantes pa la promoción de grupos emerxentes dientro de la música celta y folk.
El tríu de folk entós ta formáu por Celia Nieto -vigulín-, Adrián Argüelles -flauta- y Javi Menéndez -cuerdes-, y asoleyó apocaya’l so primer trabayu discográficu homónimu. Trátase d’un EP de cinco temes nel que reellaboren melodíes tradicionales y axunten composiciones propies, grabáu y producíu por Senén Fernández nos Estudios 15:40 de Perdones (Gozón). El so soníu mira al folk dende perspectives estremaes, con atmósferes seles que contrasten con pieces enérxiques y rítmiques, y nel qu’hai espaciu pa melodíes tradicionales de les tres fasteres del país.
Suscríbite a les nuestres novedaes
