«Dos años de bache». Asina define Delfín Valdés, vocalista de La Tarrancha, lo que’l so grupu vivió por cuenta l’andanciu. Pocos conciertos, parar los ensayos por mor de contaxos y cuarentenes, composición de temes «que nun llegaron a materializase» y hasta la frustación de nun poder llegar a tiempu a participar nel discu tributu de grupos asturianos a Soziedad Alkohólika. Sicasí, la veterana banda de mecigayu-ska pasa la fueya del Coronavirus y presenta novedaes pa lo que queda d’añu: 8 conciertos confirmaos y la publicación d’un cantar nuevu, «Tiempu de sidra y roses».
«La presentación de «Tiempu de sidra y roses» va ser la primer selmana del mes d’abril y va dir con videu musical», comenta Valdés. Va servir pa calentar la primer fecha de la nueva xira, la del 8 d’abril nel Festival Internacional de la Cerveza de Llangréu (FICAL) y a la que van siguir otres confirmaes nel Sol Celta d’Avilés -6 de mayu-, en Vil.lablino -20 de mayu-, nel Maizu Rock d’Intriagu -2 de xunetu-, n’El Puntal de Villaviciosa -9 xunetu-, na llocalidá lucense de Barreiros -23 de xunetu-, en Torrelavega -20 d’agostu-, y na Noite Celta de Porcía del 27 d’agostu. «Esti videu va ser una especie de video-selfie», desplica Valdés, matizando que con él siguen «la filosofía Do It Yourself de val más facelo que mandalo o fáilo tu mesmo». «Siempre nos autoproducimos, facemos los nuestros propios diseños, la nuestra propia promo, la nuestra propia música y tamién los videos».
Los tiempos pelos que tamos pasando van tar mui presentes nuna lletra: «murnia, cruda anque tamién con una miguina d’esperanza». «Trata de qu’esti mundu va a la sinrazón, vamos cuesta abaxo ensin frenos y hai que volver a poner los pies na tierra y recuerda que los tiempos pasaos son tiempos pasaos, pero hubo dalgún momentín pequeñu de de la historia nos qu’hubo díes de sidra y roses y hai que recuperar esos díes d’una mayor conciencia social de la que tenemos agora», esclaria’l vocalista de La Tarrancha.
Musicalmente «ye un tema baillable, pegadizu, con fuercia y contundencia y con un estribillu bastante pegañosu». El ritmu márcalu un punk-folk xenéricu «ensin nenguna procedencia nin pretensión local en cuantes a les raíces d’esi folk» y nél destaquen l’acurdión, la incorporación de xiblates y la mandolina que mete Nico Braña de Vodoo Grass, al que llamaron pa collaborar con un resultáu «bien guapu».
Próximos trabayos
«Va tiempu que nun sacamos un discu y deberíemos. El tema ye qu’esti parón del Covid a La Tarrancha nun-y sirivió para crear material nuevo sinón tolo contrario. Y hai dalguna cosa nueva, pero tanto como pa un discu non. Entós la filosofía va ser dir grabando temes sueltos, intentar faer videos y dir soltándolos», desplica Delfín Valdés. En cuantes a los tiempos, sorraya que nun se marquen plazs: «Simplemente vamos dir faciendo, que cada llanzamientu lu marque la vida personal, los conciertos que tengamos… esa va ser la filosofía; vivir la vida y la música ensin tener que marcanos feches». D’esta manera, «Tiempu de sidra y roses» va ser, depués de «Llara echó moza» -publicáu nel compilatoriu d’Engarradiella-, y «¡Vaya sociedá!» -del discu «El mio cantar»-, el tercer cantar nuevo que La Tarrancha asoleye dende qu’en 2018 llanzaron el so últimu CD ‘Baillando con Llokes».
Suscríbite a les nuestres novedaes
