Tever presenta esti sábadu’l “Taller d’Innovación Musical y Lutería”

Esti sábadu 19 a les 17h na casa la Cultura de Teberga, Tever presenta Chalga, el Taller d’Innovación Musical y Lutería 3D. Tres d’algamar l’oxetivu na campaña de micromecenazgu de Verkami, el gaiteru y informáticu va falar d’esti proyectu col que quier convertir a Teberga nun epicentru innovador de la música tradicional asturiana con un taller musical pioneru dedicáu a la creación d’instrumentos asturianos con tecnoloxía d’impresión 3D, asina como a la formación musical, la investigación y el desarrollu de proyectos creativos. Na cita tamién va estrenar “Suañu de Gaita“, videoclip adelantu del so próximu trabayu.

Chalga garra’l so nome de les “chalgas”, pallabra asturiana que faen referencia a les ayalgues escondíes que, según la cultura popular, dexaron enterraos en dellos llugares d’Asturies, como la Peña Sobia de Teberga, la xente musulmán qu’habitó n’Asturies..

“En Teberga, a les persones que busquen estes ayalgues llámase-yos chalgueiros. Los mayestros de música tradicional tamién somos buscadores d’ayalgues, chalgueiros de la educación musical coles nueves tecnoloxíes como pala pa cavar”, deplica Tever Díaz. 

Col enfotu n’atopar nueves ayalgues musicals, Chalga quier ser la primer lutería 3D d’Asturies, pero tamién un espaciu de formación, creación y investigación abiertu a tolos profesionales, lutieres y músicos interesaos na música tradicional. “La meyor receta pa combatir el duru diagnósticu de l’Asturies vaciada ye enllenar los nuestros pueblos de proyectos innovadores que creen valor, texen redes y atraigan a la xente. Si ye a traviés de los nuestros raigaños, el futuru ye nuestru”, añade Díaz.

Un gaiteru tecnolóxicu

Tever Díaz (Uviéu, 1984) ye gaiteru, profesor de música y inxenieru informáticu con raigaños familiares en Teberga, onde desendolca dende va más d’una década parte del so llabor musical. Miembrude la Banda Gaites Camín del Fierro y collaborador del programa La Buena Tarde de RTPA, onde tien una estaya dedicada a la música, dende 2015 ye profesor de gaita nes Escueles de Música de Proaza y Teberga. Na so llabor docente usa tecnoloxía como métodu d’enseñanza de la música tradicional, introduciendo novedaes como la impresión 3D de flautes de dixitazión. A traviés de la so canal de YouTube, dende 2020 crea conteníos divulgativos de baldre sobre gaita y música celta pa facer que la so pasión pola cultura musical tradicional y el folclore asturiano aporte a les nueves xeneraciones. Autor de dellos manuales sobre gaita, como artista publicó los senciellos Fayendo, Saltongaetton, Gaita Hero y Fervienza. En 2022, va llanzar el so primer EP, entituláu Suañu de gaita. 

Mercar discos folk de gaita tienda online