Música y poesía n’asturianu esti llunes na Universidá d’Uviéu

Coincidiendo col 21 de marzu, Día Internacional de la Poesía, el Conservatoriu Superior de Música Eduardo Martínez Torner y la Universidá d’Uviéu organicen el conciertu Al Son de la Palabra. A les 19h nel Paraninfu del Edificiu Históricu y con entrada de baldre, va arrancar esti actu nel que se van poder sentir 11 composiciones d’autores contemporáneos asturianos. Nél van sonar tres obres n’asturianu: “Singularitatem quae populo dicitur señardá”, con testu n’asturlleonés d’Iván Cuevas, música de Rubén García y interpretación de Carla Armas; “Marzu” -con testu d’Esther Prieto-, y “La Vida”, con testu de Fernando Pessoa traducíu al asturianu por Ismael Arias. Xaime Arias y Rebeca Velasco ponen música y voz a estos dos últimos testos.

Destaca amás que “Singularitatem quae populo dicitur señardá” va ser un estrenu absolutu. La obra ta formada por fragmentos del poermariu “Cácabos d’adoquín” y nella s’etemecen el recitáu en vivo por Carla Armas -ganadora xunto a Rubén García del Premiu Camaretá al Meyor Cantar 2021– cola m´suica electrónica, procesáu de la voz y soníos electrónicos en cuadrafonía.