«L’anterior discu yera muncho más puru, pero nesti quiero reforzar muncho más la melodía»
Queda menos d’un mes pa qu’asoleye ‘Lluz‘, el segundu trabayu en solitario de José Manuel Tejedor. A falta de 19 díes pa que remate la campaña de crowdfunding cola que’l gaiteru avilesín quier algamar los 6.000 € necesarios pa la financiación del álbum, el músicu publica un videu resume del so pasu pel estudiu de grabación y fala pa Musicasturiana.com de delles novedaes d’esti EP que va presentar en directo’l 14 de mayu nel Teatru Palacio Valdés d’Avilés.
«L’anterior discu yera muncho más puru. Intenté que fuera la mio esencia; pero nesti quiero reforzar muncho más la melodía», desplica Tejedor sobre la principal diferencia ente ‘Miraes‘ y ‘Lluz’. Amás, per primer vez va haber temes cantaos. El gaiteru nun desvela entá los nomes de quién va poner voz, anque adelanta qu’una de les voces ye d’Asturies y la otra «más conocida a nivel estatal». Les lletres son obra de Fany Moro y Gema Fernández; una trata «sobre la pérdida d’una collacia de manera mui dolorosa» y la otra del instrumentu que lu acompaña dende guah.e, la gaita.
Les collaboraciones de músicos d’Asturies, Irlanda y Euskadi tamién caractericen a los siete temes que van formar l’EP. «Participen Niall Vallely cola concertina, Iñaki Plaza cola trikitixa y dalgunos más que diré desvelando», comenta l’avilesín a la par qu’esclaria que tolos nomes son «conocíos pol públicu y amigos dende va tiempu». Pesie al calter internacional de les collaboraciones, los cantares nun van basase «estrictamente» con melodíes orixinaries d’esos países, anque’l músicu reconoz que «la influencia ta mui presente».
Marcáu pol confinamientu
«’Lluz’ parezme la pallabra más adecuada pa dar forma a tolos temes que fici nel confinamientu», desplica José Manuel Tejedor sobre’l nome baxo’l que s’agrupen los cantares d’esti EP. El gaiteru sorraya lo estraño que foi «tar enzarráu en casa tanto tiempu» pero esclaria que foi «mui productivu a nivel artísticu». Precisamente, nel EP va haber una nueva versión de “Lluz“, cantar que grabó en versión confinada colos sos músicos Richard García (teclaos), Juanjo Díaz (percusiones) y Juan Yagüe (guitarra); qu’amestó Sergio Rodríguez nos Tutu Estudios -onde rexistró tamién esti segundu álbum-, y que realizó audiovisualmente Javier Lueje.
Con más de la metá del oxetivu del crowdfunding algamáu, Tejedor siéntese «mui agradecíu coles aportaciones de la xente al proyectu» y añade qu’estos díes va dir llanzando «una serie de pequeños vídeos presentando les canciones y a los collaboradores». D’esta manera, el veteranu artista adáptase a los nuevos vezos de consumu musical: «la obligación ye tar siempre presente nes redes sociales, polo que ye mui interesante dir asoleyando singles y videos».
Xira y Lorient
Cola fecha del 14 de mayu marcada nel calendariu pa entamar la xira nueva nel Palacio Valdés, l’avilesín tuvo una actuación previa en Paris va unes selmanes na presentación de la programación del 51 Festival Intercélticu de Lorient. Pa José Manuel Tejedor esti eventu «ye una ventana al esterior importantísima p’Asturies» y destaca lo muncho que significa pa él «artísticamente». Amás, al llevar participando nél dende los 13 años, vio como «Asturies se facía un güecu importante dientro del festival».
Nesta edición de Lorient, Tejedor actuará nel espectáculu ‘Celtic Odysèe‘ xunto cola tamién asturiana Silvia Quesada y otros 16 pernomaos músicos de les naciones celtes. «Son dos grandes conciertos nel teatru de Lorient nos que cada artista aportamos varies pieces y trátase de dir faciendo grupos y tocando unos con otros», desplica’l gaiteru sobre esti show nel que tamién van tocar a comuña dos pieces compuestes por Ronan Le Bars, «músicu bretón que coordina tol espectáculu».
Con más de venti años n’activo nos qu’algamó los más prestixosos reconocimientos de la música tradicional, actuó per tol planeta col grupu Tejedor y fizo unos trabayos y collaboraciones que trespasaron fronteres y estilos; José Manuel Tejedor amuesa que tovía tien tien dientro muncha lluz creativa. Cola publicación d’esti segundu trabayu en solitario y tolo que va desendolcar los próximos meses, tien les ganes y la enerxía necesaries pa caltenela encesa.
