L’Asturianada y la Tarde en Danza zarren los XIV Alcuentros de Músiques Asturianes de Xixón

El pasáu 21 de mayu arrancó en Xixón la catorce edición de los Alcuentros de Músiques Asturianes qu’entamen añalmente la FMCEyUP de Xixón y el Serviciu de Normalización Llingüística nel Conceyu. Tres del éxitu de públicu nes distintes xornaes celebraes, esta selmana remata la programación a ritmu d’asturianada con Alicia Villanueva y Carlos Velasco y col baille’l país na Tarde en danza al mou Xixón na que participen Nel Villanueva con Muyeres por Grau, Leirana y María Trubia & Pau Santirso.

Esti martes 9 de xunu a les 19.30h nel patiu del Centru de Cultura Antiguu Institutu tien llugar l’actuación de dos de los intérpretes de canción asturiana con más sonadía: Alicia Villanueva y Carlos Velasco. Dambos tienen una montonera premios al costazu, ente los que rescampla que foron campeones del Premiu Obdulia Álvarez «La Busdonga» d’Asturianada nes sos modalidaes absoluta femina y masculina. La so propuesta busca nun perder la esencia de la tonada pero apurriéndo-y aire nuevo y fresco y acompañándola tamién con otru tipu d’instrumentos.

Pa zarrar con música y baille tradicional los XIV Alcuentros de Músiques Asturianes, el vienres 12 a les siete la tarde el patiu del CAAI acueye la Tarde en danza al mou Xixón, una xornada qu’entama con un taller de baille de Nel Villanueva acompañáu por Muyeres por Grau. A les 20h ye’l conciertu de Leirana, el proyectu nuevu de Nel Villanueva nel que va tar acompañáu polos músicos Satur Vega y David Fernández pa interpretar un repertoriu basáu nel repertoriu de baille y pandereta, pero arriquecíu con otros instrumentos y sonoridaes novedoses. Por último, a les 21.15h toquen María Trubia & Pau Santirso, dúu destacadísimu dientro de la escena tradicional asturiana que va poner a baillar a tol Centru de Cultura Antiguu Institutu col so repertoriu de voz y percusión.

Los Alcuentros de Músiques Asturianes de Xixón lleven dende va más d’una década puxando pola música asturiana nes sos distintes espresiones. Nesta XIV edición tamién acoyó la presentación del Anuariu de la Música Asturiana 2025 y los conciertos de Buír, Mapi Quintana & Marcos Baggiani y Ún de Grao & Rodrigo Martínez.