Hai cinco décades nació una de les formaciones más importantes de la historia de la música asturiana: Nuberu. El dúu formáu por Chus Pedro Suárez y Manolo Peñayos lleva dende 1976 cantándo-y a les llibertaes, a les lluches obreres, a la historia y identidá d’Asturies, al mundu de la mina… Y el 25 setiembre van dar un pasu más na so trayectoria: dar un conciertu xunto a la Orquesta Sinfónica del Principáu d’Asturies (OSPA).
L’Auditoriu d’Uviéu va acoyer esta cita na que van revisitase dellos de los himnos del dúu a traviés d‘arreglos sinfónicos nuevos concebíos específicamente pa esta actuación. Nesta collaboración, la OSPA propón un diálogu ente les dos formaciones y plantega alcuentru creativu nel que los cantares de Nuberu esploren sonoridaes nueves gracies a les posibilidaes d’esta formación sinfónica dirixida por Rubén Díaz.
«El resultáu va ser una propuesta concebida espresamente pa esti aniversariu y nel que la OSPA y Nuberu van compartir protagonismu enriba l’escenariu nuna esperiencia musical inédita«, declararon en rueda de prensa na presentación del conciertu el director d’Acción Cultural y Normalización Llingüística, Antón García, el xerente de la orquesta, Oriol Roch, y los miembros del grupo, Chus Pedro y Manolo Peñayos.
Dende la OSPA tamién valoren qu’esta producción enmárcase dientro de la so llinia de trabayu pa reforzar la so conexón cola creación musical asturiana y favorecer l’alcuentru ente diferentes xéneros, públicos y tradiciones y, nesti sen, el conciertu xunto a Nuberu ye una oportunidá p’averar a públicos nuevos una pieza fundamental del patrimoniu musical contemporáneu asturianu. Les entraes yá tán la venta na taquilla del Auditoriu y na web de la OSPA.
Suscríbite a les nuestres novedaes
