La Conseyería de Cultura, Política Llingüística y Deporte ta acabate de convocar el Premiu Obdulia Álvarez La Busdonga d’Asturianada, una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015. El 29 de payares el Teatru de La Llaboral de Xixón va acoyer la gala final d’esti certame que va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años).
Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que güei se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.
Como requisitu, les persones participantes nesti certame nuevu van tener que quedar clasificaes nos seis primeros puestos de los concursos locales establecíos que s’entamen pela xeografía asturiana a lo llargo del añu. Amás, va haber dos fases: la primera d’elles compriende les semifinales, que se van desenvolver nestes feches y llugares: domingu, 10 de payares, en Cangas del Narcea; vienres, 15 de payares, en La Pola Siero; y vienres, 22 de payares, en La Felguera. La segunda y última fase va ser la final del 29 de payares, nel Teatru de la Llaboral de Xixón.
L’asturianada y La Busdonga
L’asturianada ye parte fundamental de la cultura asturiana dende va sieglos y, como argumenten dende’l gobiernu asturianu, «valió como vehículu de tresmisión oral de les tradiciones, vezos y el paisaxe del país». La so práctica «axunta dellos elementos culturales y humanos que la convierten nun símbolu d’identidá y cohesión qu’axunta y vertebra a la sociedá asturiana».
La Conseyería de Cultura, Política Llingüística y Deporte escoyó la figura d’Obdulia Álvarez Díaz, más conocida como La Busdonga, pa dar nome a esti certame de música asturiana cola mira de «reivindicar la trayectoria d’una muyer que na primer metá del sieglu XX impúnxose a los estereotipos de la dómina y foi quién a destacar pol so talentu musical».
Suscríbite a les nuestres novedaes
