Yá ta en toles plataformes musicales y a la venta na tienda online Provinciana, el primer discu de llarga duración de Viuda. Tres de llanzar nos últimos años cenciellos como «Alleraná» o «Una de mieu«, esti cuartetu femenín de punk escuru asoleya agora «un discu conceptual nel que la industria ye a la par protagonista y imaxe identitaria», comenten dende’l sellu carbayón Humo Internacional. Nél, pueden sentise nueve pistes en castellanu «que lleven por títulu nomes de fábriques y que ta dedicáu, más que nunca, al so llar, Asturies».
Una introducción na que ta sampleada una grabación de La Busdonga de 1929 de l’asturianada «Al pasar por el puertu» abre esti álbum nel que «Viuda despelleyen la so visión d’Asturies, les sos frustaciones y la so rabia, arrequexando la copla y les castañueles nuna esquina», despliquen dende la discográfica. Nesti sen, temes como «Cigarreres», «Ence», «Aceralia» o «Quincallera» dan forma a los nueve temes que reflexa’l soníu punk únicu d’esta formación
El trabayu ta grabáu y amestáu por Elisa Gómez en Deva -«nesta ocasión, la batería grabóse nun horru», esclaria la nota prensa d’Humo Internacional-; masterizáu por Guillermo Rojo; y la portada ye una escultura de David Martínez -«arrodiada d’un cielu plomizu y los colores del carbón»-, fotografiada por Eva Llavona y con diseñu de Sara Rego.
Tres años de trayectoria
Viuda debutaron en 2021 y d’entós pacá, conciertu a conciertu, fueron dexando más y más claro que’l llugar que-yos correspuende ye’l de referentes. La so propuesta inicial entemecía copla y punk pero foi avanzando per un camín que bebe del folklore, el cine, les artes visuales, la cultura popular y lo cañí. Too ello d’una manera profunda, divertida y ambiciosa y con Asturies bien presente, como amuesa esti Provinciana.
Suscríbite a les nuestres novedaes
