Xixón ye’l conceyu que más música n’asturianu programa lo mesmo dende les instituciones que dende’l movimientu asociativu. Esti fin de selmana -enantes de qu’entame’l Festival Arcu Atlánticu– hai una triple cita que va acoyer nueve actuaciones los sones del país en distintos eventos festivos: les fiestes populares de Ciares (vienres 25 y sábadu 26) y la Nueche Celta de Granda.
Les fiestes populares de Ciares van desendolcase’l fin de selmana nel campu de fútbol La Cruz y, ente la bayurosa programación, hai el vienres 25 los conciertos d’Ilustres Patilludos (02h) y el sábadu 26 los de de les Pandereteres de Ciares (12.30h), Rollu Folk (13.30h), Bandina Los Muiles (19h), 6 Riales (20h) y La Tarrancha (00h). La programación ta entama pola asociación Esto Ye Ciares, que puxa dende va unos años por ufrir un modelu festivu distintu al de grandes orquestes y concesión de la xestión a empreses privaes.
Con esa mesma filosofía, la Comisión de Fiestes de Santana entama del 22 al 28 de xunetu les fiestes de Santana dientro de la que s’alcuentra la Nueche Celta de Granda, qu’aporta esti domingu 27 a la so XXVI edición. Nella va haber un taller de baille tradicional (19h) y dende les 21h actúa’l Grupu Folklóricu Trebeyu, Pandereteros d’Anguaño, Herbamora y los irlandeses Beeswing.
Na semeya, les fiestes de Granda.
Suscríbite a les nuestres novedaes
