El Ciclu Festivu del Branu ta dedicáu a les ofrendes de ramos

Del 22 de mayu al 29 de xunu Avilés va acoyer delles actividaes rellaciones cola cultura tradicional del país. L’agrupación folclórica Escontra’l Raigañu entama’l Ciclu Festivu del Branu con charres, talleres, enrame de la fonte, esposición, alcuentru de panderetes y tarde en danza. Sacantes dalgunes, la mayoría de les actividaes xiren alredor de les ofrendes de ramos, van facese nel Centru Sociocultural de Llaranes y son de baldre.

Esti llunes 22 de mayu a les 19.30h entamen les xornaes cola charra de Fonsu Fernández, director del Muséu de la Gaita, entitulada ¿Qué ye la tradición? Un percorríu dende’l romanticismu del sieglu XIX al asturianismu d’anguaño. Nella van tratase cuestiones como “¿Qué quier dicir la pallabra “tradición” y cuándo entamó a sentise? ¿Por qué un conceptu conservador enraigonó ente la mocedá progresista y non ente la conservadora? ¿Cómo ye qu’emponderamos la sociedá tradicional y al empar condergamos coses que nun-y son ayenes, como’l patriarcáu, el clericalismu y los roles de xéneru?”

Fernández repite ponencia pal vienres 26 a les 19.30h, nesti casu acompañáu con Xosé Ambás. Van falar de Les ofrendes de ramos n’Asturies analizando formes, finalidá, orixen y el trabayu de campu desendolcáu nesti sen. Alredor d’esta cuestión Fe Santoveña va impartir el taller Armando’l ramu l’Oriente, con un preciu de 6 euros y pal qu’hai qu’apuntase per corréu electrónicu. Nél va desplicar cómo se fai el ramu, qué lleva y qué nun lleva o, ente otres coses, l’espaciu femenín de los ramos anque llueu fueran d’usu públicu.

Tamién la Casa la Cultura d’Avilés va acoyer dende’l 5 xunu una esposición sobre les ofrendes de ramos n’Asturies a la que dan forma diecisiete semeyes de la colección del Muséu del Pueblu d’Asturies y tres ramos físicos. Amás, el xueves 22 de xunu pela mañana va enramase la fonte de la Plaza Mayor de Llaranes y pela tarde va haber una amuesa de sones y danza prima alredor de la fonte.

Alcuentru de panderetes

El zarru d’estes xornaes va ser el xueves 29 de xunu, a les 19.30h, na Plaza Mayor de Llaranes, con un Alcuentru de Panderetes de les escueles del Grupu de Baille San Félix de Candás, onde imparte clases Eva Tejedor, y l’alumnáu de los cursos d’Escontra’l Raigañu que da Ramsés Ilesies. Pa rematar va haber Tarde en Danza cola participación d’una bandina y grupos de pandereteres.