La discografía de Llan de Cubel yá ta en Spotify
Pasín a pasu, Musicasturiana.com sigue avanzando nel so procesu d’ampliar el catálogu de la música’l país que se pue sentir nes plataformes musicales dende cualquier llugar del mundu; un llabor qu’entamó va más de cinco años y qu’agora mesmo suma más de 350 referencies disponibles. Dende güei, gracies al alcuerdu algamáu con Fono Astur, yá tán disponible en Spotify, Apple Music, iTunes, Amazon Music, YouTube y otra montonera de plataformes dixitales, dellos de los llanzamientos polos que más taba naguando’l públicu: la (cuasi) discografía de Llan de Cubel.
D’esta manera Na Llende, L’Otru Llau de la Mar, IV y Un Tiempu Meyor yá suenen xunto a La Lluz Encesa. Nes próximes selmanes la intención ye que tamién tea disponible Deva, primer discu d’esta mítica formación folk de la que yá nun queden copies físiques a la venta.
