Leticia Baselgas presenta los sos ‘Diarios d’una panderetera’ y ufrimos el prólogu n’esclusiva

Leticia Baselgas -la metá de L-R, cantante, panderetera, artista visual y doctora n’Arte- espubliza cola editorial La Fabriquina los Diarios d’una panderetera, un ensayu compuestu a partir de los sos escritos personales como panderetera dende que yera una neña, reflexonando al rodiu la tradición, la identidá y l’autenticidá. Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográficu; y, pa cabu, la so llegada al conceptu de post-folk-asturianu como un espaciu de llibertá creativa.

El llibru va tar disponible esti xueves 5 d’avientu -día que se va presentar en Xixón nel Arca de Noé, a les 19h- pero dende musicasturiana.com adelantamos n’esclusiva un estractu inéditu del prólogu escritu por David Guardado:

«Paezme que foi a mediaos de 2007 cuando sentí falar per primer vez de Leticia Baselgas. Una nueche, probablemente nel Café Trisquel o nel bar La Plaza (realmente nun n’acuerdo aú foi, pero préstame imaxinalo asina) Poli Mencía, ún de los usuarios más activos de la comunidá de blogueros asturianos, que taba monopolizada dafechu por homes, diome una información que, nesi momentu, yera una gran noticia: una moza moscona (¡por fin una muyer daba’l pasu!) taba acabante crear un blogue, La mirada moyada; escribía n’asturianu occidental, y reflexonaba sobre l’arte y la identidá en términos poco comunes daquella. Nun podíamos imaxinar que, amás, esi blogue yera parte d’un viaxe personal a la gueta de respuestes a les milenta preguntes que Leticia llevaba años faciéndose sobre la intensa pulsión afectiva que sentía hacia’l folclore y alredor de la so rellación col baille y la música asturiana.

Porque l’autora d’estos Diarios d’una panderetera yá buscaba daquella, asina nos lo cuenta nes llinies que vas lleer darréu, una verdá articulada y coherente qu’apurriera una base racional y respuestes sólides a les sos duldes sobre conceptos como identidá colectiva, tradición o saber del pueblu; y, p’atopales, creyía necesitar una brúxula teórica cola que diferenciar lo verdadero de lo falso. Esti viaxe, como nos cuenta nestos diarios, foi llevándola dende la ruptura col imaxinariu folclóricu posfranquista, a traviés d’una suerte de revelación que la emburrió a abrazar el mundu del baille y la música tradicional, hasta un posterior desencantu y segunda ruptura col rigorismu etnográficu que la llevó a entender lo comunitario y lo asturiano como un espaciu de llibertá creativa col que cuestionar tou tipu de normatividaes.

El frutu d’esa reflexón personal y colectiva son estos diarios que, agora, esbillaos, resumíos, estractaos, editaos y reescritos pola autora, tienes nes manes y nos que Leticia fainos cómplices de les sos reflexones, del so procesu d’evolución, namás aparentemente individual y íntimamente rellacionáu cola construcción de la so personalidá dende neña, qu’engancha a un llector qu’asiste a una narración clásica con planteamientu, nuedu y desenllaz y que «necesita» conocer el resultáu de les subtrames que, en forma de conflictu, van plantegándose a lo llargo del llibru.

[…]

Pero esti llibru nun fala solo de Leticia nin d’Asturies. Munches de les persones que nel sieglu XXI busquen y rebusquen, que descubren y redescubren, reinterpreten y inventen les identidaes rellacionaes cola llamada tradición, con cualquier tradición, faense les mesmes entrugues y nagüen por atopar en cualquier parte del mundu lo mesmo que Leticia y los sos compañeros de viaxe: qué ye esi caldín del que nos falen estos diarios, que ye malu de definir, pero que tantos y tantes sienten como una verdá tanxible que fai parte de les sos vides. Leticia Baselgas enséñanos en Diarios d’una panderetera que si la busca ye tan metódica como la d’ella acabará volviéndonos irremediablemente al puntu de partida, onde descubriremos que la verdá absoluta pola que naguamos nun esiste, porque ta, de forma inevitable, ideolóxicamente condicionada. Pero esa constatación, l’alcuentru colo real, el descubrimientu final, que tien abondo que ver cola perda de la inocencia y cola madurez intelectual, nun nos empobina necesariamente al desengañu o a la inacción, sinón que, como nel casu de l’autora d’estos diarios, puede ser la materia cola que se llevanten los proyectos qu’emburrien eses identidaes escontra’l futuru, con nueves formes, ilusiones y proyecciones que nos sirven pa qu’esi caldín colectivu que llamamos identidá asturiana, esa comunidá qu’imaxinamos, inventamos y facemos esistir cola nuestra práctica, el nuestru pensamientu y los nuestros cuerpos, mute, reniegue, arriesgue o repliegue, pero enxamás muerra. Estos diarios son gasolina puro pa que la llaparada perviva».

Primeres presentaciones

Leticia Baselgas va presentar per primer vegada los sos diarios nel bar-tienda El Arca (Xixón) esti xueves 5 d’avientu a les 19h xunto a David Guardado y la musicóloga esperta en xéneru Laura Viñuela. Amás, MataderoUno (Uviéu) va acoyer la segunda presentación el prósimu vienres 13 d’avientu a les 19h. Nesta ocasión, amás de Guardado, Baselgas va tar acompañada de la llibrera Natalia González Menéndez. Diarios d’una panderetera pertenez a una nueva coleición de la editorial col nome MANIFIESTU, inspirada na mítica Colección Popular Asturiana d’Ayalga Ediciones, na que van asoleyar pieces qu’amuesen el pensamientu actual asturianu -sobre Asturies y dende Asturies-, nun formatu curtiu y accesible. Estos escritos de Leticia Baselgas son la primer incorporación.