Dos de los nomes más orixinales y mozos de la música asturiana d’anguaño tán acabante d’anunciar que van compartir escenarios. Trátase de Ferla Megía y Llevólu’l Sumiciu que, tres d’asoleyar en payares los sos nuevos EP y de la mano de l’axencia Lacre, van tocar en ‘Las Noches del Casino’ de Llanes -13 y 14 d’avientu- y en La Salvaje d’Uviéu -28 d’avientu-.
Ferla Megía va poner enriba l’escenariu’l so últimu trabayu, Páxaros 01, un EP qu’espeya la so evolución como artista hacia un estilu qu’amiesta xéneros como’l folk, el dembow, el trip hop y la electrónica. A la fin, la fusión ente la tradición asturiana y les tendencies d’anguaño. Llevólu’l Sumiciu, pel so llau, tán tamién acabantes d’asoleyar un EP, La Llobera, un discu qu’homenaxea a la mitoloxía y la música de raigañu asturiana nun contestu d’eleutrónica con ritmos y sonoridaes del dembow afrolatinu y el Jersey club. Los audiovisuales completen el so espectáculu.
La selmana viniente dambos artistes actúen en Llanes en ‘Las noches del Casino’. L’accesu ye de baldre con retirada previa d’invitación nesti enllaz. Ferla Megía va tocar el vienres 13 a les 20h y Llevólu’l Sumiciu‘l sábadu 14 a la mesma hora. Per otru llau, les dos formaciones y Lacre -la so axencia de contratación- zarren la temporada con un doble conciertu pal próximu sábadu 28 d’avientu a les 21h. na sala La Salvaje d’Uviéu. Les entraes puen mercase equí con un preciu de 10,55 €.
Suscríbite a les nuestres novedaes
