Llaceria Rock vuelve dar un conciertu venti años depués de dexar la so actividá
«Llaceria Rock fuimos un grupu de punk-rock n’asturianu, formáu en Gozón nel 98 o 99 por colegues del institutu, que tocamos dos o tres añinos, que grabemos una maqueta que ta colgada en YouTube y s’entitula ‘Yá Tamos Equí‘ y que pa lo poco que duremos, en Gozón sí que tuvimos dalgo de sonadía». Asina resume Miguel Fernandi ‘Burilo’, anguaño cantante de Skama la Rede, lo que foi la so primer formación. 20 años depués, la banda volvió a dar un conciertu pol so aniversariu y el próximu 25 d’avientu, a les 23.30h y con entrada llibre, van volver a facelo na Sala Livingstone de Lluanco.
«Vamos tocar los cantares de la maqueta, dalgún más que teníemos fecho y versiones de punk-rock: de La Polla, Reincidentes, de Dixebra… y tamién de Karne Antisocial, que pa nós fueron un referente y que de fechu va dos años cantó con nós les sos versiones Lolo Muñiz, el cantante del grupu y autor de “Xuacu Xinta Xorra“», comenta ‘Burilo’ sobre lo que va poner enriba l’escenariu esti sábadu esta banda formada por xente que tamién tocó en grupos como Güerku, La Tarrancha o delles orquestes.
Pesie a esti conciertu especial dos años depués de la so última actuación y dos décades más tarde desque entamaron a ensayar, Fernandi matiza que «tampoco hai nenguna intención de tirar pol grupu más allá de dar dalgún conciertu d’esti calter». Mentanto, quien quiera facer alcordanza del punk-rock con identidá asturiana que se facía d’aquella en Gozón, pue sentir ‘Yá Tamos Equí’ y pasar esti sábadu pela Livingstone de Lluanco pa ver a Llaceria Rock.
