Marisa Valle Roso sigue asoleyando material nuevu rellacionáu con Cenicientes, el discu que publicó en setiembre del pasáu añu. Si va un mes publicaba’l cantar inéditu ‘Acebachi‘, qu’amosaba la so cara más electrónica, agora da un pasu más na so esperimentación con esti estilu musical nel llanzamientu del remix de ‘Al molín’, tema tradicional incluyíu nel so discu últimu y qu’agora suena na so versión folktrónica cola remestura que fai Llevólu’l Sumiciu.
El dúu d’electrónica de raigañu formáu polos hermanos Pablo y David Alonso fai d’esta canción una pieza empobinada pa la pista de baille, influenciada por dellos estilos dientro de la música electrónica. Al cantar, que yá pue sentise en toles plataformes musicales, acompáñalu un lyric video realizáu por Dani Bega, con una estética que tamién recuerda a les obres audiovisuales que pueden verse nos directos de Llevólu’l Sumiciu.
Con esti llanzamientu l’artista llangreana calez l’ambiente pal conciertu que va dar el próximu 12 d’agostu a les 13h na Plaza Mayor de Xixón dientro de la Semanona. Per otru llau, Llevólu’l Sumiciu -que toquen esti martes, miércoles y xueves nel Festival Intercélticu de Lorient-, siguen amosando la so capacidá pa reellaborar pieces d’artistes de la música’l país dempués de facelo con otros temes Dixebra, Mapi Quintana, Corquiéu, D’Urria o Nuberu.
Suscríbite a les nuestres novedaes
