Llevólu’l Sumiciu llanza’l videu d’un directu na Llaboral
El dúu de música electrónica asturiana Llevólu’l Sumiciu ta acabantes d’asoleyar “Live Set Branu’21“, el videu d’una actuación en directo grabada na Llaboral de Xixón en setiembre del añu pasáu. Nesti llanzamientu reflexen tol potencial que tien la so propuesta audiovisual cuando se dan les condiciones técniques afayadices pa representala y, dientro del repertoriu grabáu, interpreten tanto cantares que formen el so primer EP ‘Entaína‘ como otros inda inéditos.
Llevólul’l Sumiciu naz en 2020 cola intención d’amestar música asturiana y electrónica. El proyectu tá formáu polos hermanos Pablo y David Alonso, que s’encarguen de les estayes musical y visual respeutivamente. Defínense como un proyectu audiovisual au la imaxe y la música s’entemecen pa reinterpretar l‘imaxinariu asturianu de forma esperimental. Pa la parte visual, inspírense n’imaxes d’archivu que reflexen el costumismu de los años 70 y 80, el patrimoniu mineru y industrial y de xemes en cuando’l trabayu d’aristes llocales. La parte sonora básase en cantares tradiciones acompañaos por ritmos de reggaeton o baille funk y bones dosis de distorsión y glitches.
Depués de presentar dende finales del 2020 los singles “Saldiguera“, “Muncho Quixera Tener” y “Salir Moces a Bail.lar“, los dos hermanos que dan forma a esti proyectu llanzaron en setiembre ‘Entaína‘., un EP formáu por seis cantares que, como ellos mesmos dicen, «restolen pente la música y lo visual, pente l‘Asturies natal y el Caribe, pente‘l pasáu y el futuru». Con esti trabayu la música asturiana renuévase y cantares de formaciones como Nuberu, D’Urria, Xaréu Folk o Grupu Trasgu suenen más actuales y mestizos gracies a la revisión que faen d’ellos Llevólu’l Sumiciu fusionándolos con ritmos afrollatinos y electrónicos.
