L-R tán nominaos en 7 candidatures de los XIV Premios MIN

Los Premios de la Música Independiente (MIN) aporten esti 2022 a la so XIV edición y nellos va volver haber presencia de la música asturiana. En 2020 Rodrigo Cuevas algamó’l premiu nes estayes de “Artista Revelación” y “Mejor Álbum de Fusión y Músicas del mundo”, y nesti 2022 L-R tán nominaos en siete candidatures: “Artista Emergente”; Meyor “Album” y “Album de Músicas de Raíz” con ‘N.O.S.’; “Canción del Año” con “Veis volver”; “Letra Original” con “Mirada Moyada”; “Producción Musical” de Rubén Bada; y “Videoclip” con “Veis Volver”. En total hai más de 800 artistes nominaos en 22 estayes y el públicu yá pue votar a traviés de la web del eventu.

Los Premios MIN van cellebrase esti añu el miércoles 27 d’abril nel espaciu Navarra Arena de Pamplona/Iruña. L’eventu ta organizáu pola Unión Fonográfica Independiente (UFI) col oxetivu de reconocer la creación y la diversidá musical independiente, ye dicir, aquella que nun forma parte de les multinacionales discográfiques. Cola presentación del dúu post-folk L-R a les siete candidatures ye la primer vez qu’un proyectu n’asturianu dafechu va competir nestos gallardones, nos que nun hai estayes propies pa la música fecha en llingua asturiana, como sí que les hai pal “Mejor Álbum” en catalán, euskera y gallegu, amás de que’l “Premio a la Mejor Letra Original” pue tar escrita en cualquiera de les llingües oficiales, pero non n’asturianu.

Tres la fase de votación del públicu van escoyese los 15 semifinalistes que van tar nominaos definitivamente en caduna de les 22 estayes y a los que’l xuráu profesional va premiar na gala del 27 d’abril de Pamplona. Amás de L-R -que llamen «a votar ya collaborar col reconocimientu de la música asturiana, la música n’asturianu ya la muyer creadora na industria musical»-, esti 2022 tamién hai presencia de tres artistes más d’Asturies: Nacho Vegas, Staytons y Pablo Und Destruktion.

Compra discu “N.O.S.” na tienda online y siéntilu nes plataformes dixitales