El dúu d’electrónica de raigañu Llevólu’l Sumiciu ta acabante d’asoleyar un videu col conciertu completu que dieron nel Semando Fest, el primer festival de música moza n’asturianu qu’entamó musicasturiana.com el pasáu 4 de febreru. La obra audiovisual inclúi cantares inéditos, ta realizada pola productora Báltico y asina la presenta’l dúu: «Ocurriósenos grabar el conciertu pa tener un set actualizáu p’amosar y nun podemos tar más contentos col resultáu. Gracies a toxs por baillar con nós esa nueche»
Los hermanos Pablo y David Alonso -nacíos en Castrillón en 1993 y 1994 – formen Llevólu’l Sumiciu, proyectu musical y audiovisual qu’amesta música asturiana y música electrónica, entemeciéndola con imáxenes de la cultura popular y del mundu del trabayu n’Asturies. A finales de 2021 asoleyaron ‘Entaína‘ el so primer EP, nel que los soníos de raigañu suenen más actuales y mestizos gracies a la revisión que faen d’ellos fusionándolos con ritmos afrollatinos y electrónicos. Too ello con un directu nel que les proyecciones audiovisuales comparten el protagonismu cola música, como podemos ver nesti videu.
Suscríbite a les nuestres novedaes
