Les pandereteres de Lo Nueso van tocar na próxima edición del festival de música independiente Prestoso Fest que va celebrase en Las Barzaniel.las de Cangas del Narcea ente’l 7 y el 9 d’agostu. Esti eventu que lleva acoyendo’l mediu rural de la fastera suroccidente dende 2014 sigue programando música asturiana dempués de los conciertos de Tania Pereira y, tamién, Lo Nueso, na so cabera edición; Llevólu’l Sumiciu y Rodrigo Cuevas en 2023; y los Pandeiros de Xedré en delles ocasiones.
Lo Nueso son una asociación cultural integrada por muyeres pandereteres y cantadores de música tradicional que se formaron na Escuela de Música Tradicional de Cangas del Narcea. El Prestoso Fest dedicó-yos estes pallabres cuando dieron anuncia de la so participación: «Lo Nueso ye muncho más qu’una asociación na que s’axuntar pa tocar el pandeiru y cantar. Gracies a Lo Nueso conocemos meyor el nuesu folclore y los nuesos vezos ancestrales. Ye un honor qu’estes muyeres suban un añu más al escenariu del Prestoso y echen a andar el festival colos sos cantares».
Suscríbite a les nuestres novedaes
