Pasín a pasu van anunciándose más feches d’esos eventos que puen calificase de «fundamentales» pa tola xente siguidora de la música asturiana. Güei anunció les sos feches el FolkAyer, que va celebrase de 22 al 28 de xunu en Morea. Llega asina esta cita a la so decimoprimer edición como Alcuentru Folclóricu n’Ayer, nome que caltuvo toos estos años pero qu’en 2023 añadió-y la denomación de FolkAyer.
«Una selmana pa disfrutar de la música folk, la tradición y l’ambiente que fai de Morea un llugar especial. Conciertos, cultura, actividaes y munches sorpreses nun entornu únicu», publicó’l festival dende les sos redes. Esti añu destaquen les novedaes: l’eventu pasa de durar trés díes a siete y, en cuenta de celebrase n’ochobre, va facese en xunu.
Al marxe d’estes novedaes, la escencia del FolkAyer, que ta entamáu pola Banda Gaites El Gumial col sofitu del Conceyu d’Ayer, va siguir siendo la que vien dándo-y personalidá al festival nos últimos años: un amiestu de conciertos, alcuentru de bandes de gaites, talleres, mercáu, gastronomía y otres actividaes que van dir anunciándose próximamente.
Na semeya, de Lucía Garó, una actuación de Trebeyu na edición del añu pasáu
Suscríbite a les nuestres novedaes
