El númberu 132 de la revista Lletres Asturianes, publicada pola Academia de la Llingua Asturiana, recueye ente los sos conteníos un trabayu tituláu «’Atiendi, Asturies, atiendi’: los efeutos de la interpretación musical y coleutiva de dellos poemes de Manuel Asur», robláu por Daniela Cortina González (Universidá d’Uviéu/Filoloxía Hispánica —mínor n’asturianu—). Nél faise un análisis del impactu que tuvo na sociedá asturiana la musicalización de dellos poemes de Manuel Asur fecha pol grupu Nuberu. Contestualízase históricamente’l momentu nel que s’asoleyaron aquellos cantares, col surdimientu d’asociaciones y colectivos como Conceyu Bable y Camaretá, falando de les diferencies qu’había ente elles, tando la primera más centrada nel aspectu llingüísticu d’aquel asturianismu de nuevu cuñu y la segunda n’aspectos más sociales y/o políticos.
Otra cuestión na qu’incide esti trabayu ye sobre qué efectos tuvo qu’aquellos testos pasaren de poemes a cantares, analizando les característiques sociales y ideolóxiques del públicu al que diben dirixíos. Reflexónase tamién sobre la manera en que los asistentes a los conciertos entendíen los cantares, interaccionaben con ellos y convertíense nun sentir colectivu. Trata, amás, sobre la vixencia de les idees del Nuevu Canciu Astur y la so influyencia na música asturiana posterior.
Na última parte del trabayu, faise una comparanza ente los cantares de Nuberu con lletra de Manuel Asur y otros de grupos contemporáneos como Dixebra («Nun llores», «Da-yos caña», «Mañana fría» y «La danza»), Spanta la xente («Díes de barricá», «Letavia» y «Sones») y La Co.lá Propinde («Val.le’l Turón» y «La foguera»).
Nel capítulu de les conclusiones, l’autora espresa que «el movimientu de reivindicación llingüística que surde na Transición va topar nes manifestaciones culturales una vía afayadiza pa esparder el so mensaxe. La lliteratura va sirvir como un mediu nel qu’espresar les sos preocupaciones al mesmu tiempu que’l propiu fechu d’escribir en llingua asturiana cumple’l so propósitu de dignificar la llingua y da-y más niveles d’usu. Escribir n’asturianu yá supón, polo tanto, una actitú política, sobre manera si se tien en cuenta’l puxu que’l movimientu taba garrando nesi momentu». Otra manera, les canciones de Nuberu funcionen como una seña d’identidá de la xeneración moza de los 70/80, que fala del so contestu inmediatu, de les preocupaciones del momentu y de los preseos colos que se construyó una nueva asturianidá ensin prexuícios.
Trátase d’un estudiu mui documentáu y bien interesante pa ver cómo la música foi una ferramienta d’acción colectiva nos años 70-80, nel momentu en que surde y s’esparde un discursu orixinal y novedosu sobre Asturies.
L’artículu pue descargase llibremente nesti enllaz:
https://reunido.uniovi.es/index.php/Lletres/article/view/22134/16823
Suscríbite a les nuestres novedaes
