Yá se conocen los tres ganadores del I Premiu Obdulia Álvarez La Busdonga d’Asturianada: Lorena Corripio López (categoría absoluta femenina), Marina Carbajosa González (categoría moza) y Carlos Velasco Montes (categoría absoluta masculina). Compitieron por algamalu esti pasáu vienres 29 de payares nel Teatru La Llaboral de Xixón xunto a Alicia Villanueva Medigo (categoría absoluta femenina), Néstor Díaz González (categoría moza) y Sergio Menéndez Fernández (categoría absoluta masculina). Los seis intérpretes actuaron acompañaos a la gaita por Ramón García, y a la percusión por Simón San José y Montse Trabanco. Amás, na gala tamién sonaron les voces de Mariluz Cristóbal Caunedo y Jorge Tuya.
Los seis finalistes aportaron a la última fase del premiu dempués de les tres semifinales de Cangas del Narcea, La Pola Siero y La Felguera. La Conseyería de Cultura, Política Llingüística y Deporte convocó esti I Premiu Obdulia Álvarez La Busdonga d’Asturianada pol que repartió, esti vienres, 15.000 euros nes tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá, nesta reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial en 2015.
Suscríbite a les nuestres novedaes
