El Mercáu Quirosán de Bárzana aporta a la edición númberu ventiún esti fin de selmana. Amás del mercáu y de delles actividaes y talleres pa tola familia, la música y la cultura tradicional protagonicen l’eventu. El VIII Alcuentru de Bandes Gaites y los conciertos de La Tarrancha, La Banda Latira, Los Gascones, amás de l’actuación del Grupu Golclóricu Blimea y del Dúo Maravio, dan forma a la programación del sábadu 3 y domingu 4 de mayu.
El sábadu 3 a les 13h actúen en sesión vermú la formación astur-bretona La Banda Latira, mientres que pela tarde’l protagonismu va ser pa les agrupaciones que trabayen cola cultura tradicional del país. A les 17h desfilen delles bandes de gaites y agrupaciones folclóriques per Bárzana y a les 18h ye’l VIII Alcuentru de Bandes de Gaites nel qu’actúen La Banda Gaites de Castrillón, Saxum de Xixón, Teixo-Manolo Quirós -anfitriona del eventu-, l’Asociación Folclórica La Flor de Grau y l’agrupación galleta Bico da Balouta (Agolada, Pontevedra). Pa les 22h, el rock astur garra protagonismu col conciertu del grupu mecigayu-ska La Tarrancha.
El domingu 4 de mayu la bandina popular Los Gascones va amenizar la sesión vermú a les 13.30h, a les tres de la tarde’l Grupu Folclóricu Blimea va animar el mercáu y a les 18h el Dúo Maravio va tocar nesti espaciu cola so instrumentación de gaita, tambor, curdión y clarinete.
Suscríbite a les nuestres novedaes
