El cantautor xixonés afincáu en Méxicu DF César Maltrago asoleyó va unos pocos díes un cantar nuevu n’asturianu: ‘Tergal‘. Esti single, según pallabres de la so discográfica –Editorial Escombros-, «surde nel Valle del Güerna» y fai referencia «a un xéneru de tela usáu pa los uniformes de trabayu» y ye «un himnu antifacista nel fondu, adornáu d’una estética y una atmósfera montuna, borrinosa y opresiva, que bien podría ser una banda sonora de Danny Elfman o la música de cualquier film de Tim Burton». Too ello multiplícase cola collaboración de Nacho Vegas a la voz.
«Un cantar n’asturianu tocáu con ukelele y acompañáu por una trompeta. Dalgo asina como una especie de Frankestein pero a la contra, que furrula como un too orgánicu qu’al empar discrimina’l facismu, tanto na so temática como na so atmósfera», despliquen dende la Editorial Escombros pa definir l’adelantu del que va ser el cuartu trabayu de César Maltrago desque entamara la so carrera en 2015. Esti músicu, poeta y realizador audiovisual va llanzar el 21 de mayu El Perverso Polimorfo, discu formáu por un total de 14 temes ente los que s’alcuentra esti ‘Tergal’, l’únicu n’asturianu.
«El duetu fízose de rogar, pero a la fin llegó a mui bon puertu», desplica’l sellu al rodiu la collaboración con Nacho Vegas. Sicasí, nun ye la primer vez qu’estos dos cantautores xixoneses collaboren, porque Vegas participó nel documental Vocación de Perdedor que Maltrago dirixó pa facer alcordanza del «poeta malditu xixonés» David González. Xunto a César Tamargo -nome real d’esti artista- andechen nesti single la cineasta Nadia Penella -autora del videoclip- y Mario Villamil a la producción.
Suscríbite a les nuestres novedaes
