Los escoceses Malin Makes Music interpreten un amiestu de pieces asturianes
Malin Makes Music ye’l nome artísticu del compositor, director musical, gaiteru, flautista y violinista escocés Malin Lewis, una de les xóvenes promeses de la música tradicional y folk d’aquel país. Ganador de dellos de los premios más sonaos de la música escocesa, tien yá un prestixu y sonadía bultable magar nun tenga tovía grabao más alla de delles collaboraciones en discos d’otros intérpretes. Tien escrita y interpretada la música pa la obra de teatru The Strange Undoing of Prudencia Hart de Davig Greig, ún de los principales dramaturgos escoceses actuales. El so interés pola música de gaita llevólu a estudiar, por exemplu, la música de les antigües cornamuses finlandeses y d’otros países.
Ta acabante d’asoleyar nes redes sociales una pieza audiovisual de promoción de los sos próximos conciertos na que se recueye un amiestu –set– de varies pieces tradicionales asturianes interpretaes en directo. Na mesma ta acompañáu polos músicos Sally Simpson al violín y Luc McNally cola guitarra. La grabación ta fecha nel conciertu que dieron en xineru nel TradFest de Dublín, consideráu como’l mayor festival de música folk d’Irlanda; un eventu que principió nel añu 2006 como un pequeñu festival nun local de la ciudá, el Temple Bar, y qu’anguaño ye toa una referencia naquella isla qu’axunta a artistes llexendarios y estrelles emerxentes.
El soníu de Malin Make Music tien sío descritu como «fermosu y crudu», y la música asturiana nun ye ayena a él, nuna muestra más de la so internacionalización.
