TPA emite’l conciertu presentación de ‘Lluz’ de José Manuel Tejedor
El pasáu 14 de mayu José Manuel Tejedor presentó nel Teatru Palacio Valdés d’Avilés el so discu nuevu ‘Lluz’. Fízolo con una actuación perespecial na que collaboraron dellos de los músicos que participaron nesti trabayu. Esti domingu 10 de xunetu a les 21.45h, TPA emite’l conciertu completu y yá pue vese un anunciu d’adelantu.
‘Lluz’ ye’l segundu trabayu en solitario de José Manuel Tejedor que yá ta a la venta na tienda online y en toles plataformes dixitales ‘ Siete cortes dan forma a esti EP nos que’l pernomáu gaiteru afonda nel protagonismu de les melodíes, incorpora instrumentos qu’arriquecen el soníu de les pieces y graba per primer vez tres temes cantaos con dos collaboraciones mui especiales: la de Carlos Goñi de Revólver y la de Loreto Suárez d’Algaire. Tamién arriquecen l’álbum músicos vascos, irlandeses y asturianos: Ángel Miguel, Fani Moro, Gema Fernández, Juan Diego Gómez, Miguel Herrero y Horacio García.
«L’anterior discu yera muncho más puru. Intenté que fuera la mio esencia; pero nesti quiero reforzar muncho más la melodía», adelantaba José Manuel Tejedor a MUSICASTURIANA.COM va unes selmanes sobre la principal diferencia ente ‘Miraes‘ y ‘Lluz’. El resultáu ye evidente, con unes canciones más redondes y completes nes que xunto a los instrumentos de los sos músicos habituales -Richard García (teclaos), Juanjo Díaz (percusiones) y Juan Yagüe (guitarra)- y a les gaites y whistles de Tejedor, suenen instrumentos de viento mental, la concertina del irlandés Niall Vallely o la trikitixa d’Iñaki Plaza.
José Manuel Tejedor compuso ‘Lluz’ mentanto’l confinamientu, grabólu nos Tutu Estudios de Corvera baxo la producción de Sergio Rodríguez y financiólu gracies a una campaña de crowdfunding.
Conciertu esti sábadu
Pa quien prefiera ver a José Manuel Tejedor en vivo, esti sábadu’l pernomáu gaiteru va actuar na Nueche Celta d’El Puntal, en Villaviciosa. Nel eventu toquen tamién La Tarrancha y Calea, va entamar a les 21.00h y tien un preciu d’entrada de 5 euros.
