Uviéu acueye esti branu una esposición d’instrumentos históricos
El Centru de Recepción y Interpretación del Prerrománicu Asturianu, asitiáu nel Naranco (Uviéu), acueye hasta’l 30 de setiembre la esposición De la Imagen al Sonido, que presenten con estes palabres: «Los instrumentos musicales cuenten con una llarga historia, existiendo yá dende la Prehistoria y evolucionando col tiempu. Siendo un Patrimoniu al que nun se-y da muncha atención, tien una gran importancia y relevancia. Nesta esposición preséntense al públicu instrumentos históricos fielmente reproducíos, basaos nos existentes n’escultures de dellos edificios relixosos o civiles, amás de los soníos ancestrales recuperaos d’oxetos que faen parte del nuestru patrimoniu bibliográficu y documental, como códices o manuscritos, que tán ehí… esperando a ser espertados y escuchar el so conteníu». Na muestra pueden vese, ente otros, instrumentos de cuerda como la cítola o de percusión como el panderu.
Otra manera, ente les actividaes entamaes alredor de la esposición ta una demostración musical d’estos instrumentos, na que va poder apreciase los diferentes timbres y soníos d’ellos. Va tar al cargu de Juanma Rivero, responsable de la esposición, quien va interpretar obres musicales con dellos de los instrumentos espuestos. Les sesiones -de baldre- van ser el 17 de xunetu y el 14 d’agostu a les 12:00 hores, p’apuntase puede facese al traviés d’esti enllaz.
