Dempués de cuasique dos décades dende la implantación del Grau Profesional y tres años dende que la primer promoción del Grau Superior algamó’l títulu, el Conservatoriu Superior de Música «Eduardo Martínez Torner» va acoyer esti sábadu 22 dende 10.30h la I Xornada Les Enseñances de la Gaita n’Asturies dedicada a los estudios reglaos del instrumentu. L’eventu, que va poner el focu nes exes pedagóxiques y nes perspectives históriques y futures del tema, entámenlu los Conservatorios Profesionales d’Uviéu y Xixón, el CONSMUPA, la Universidá d’Uviéu y el Conceyu de la Gaita.
La Conseyera d’Educación Lydia Espina López, el Director del Conservatoriu Superior Fernando Agüeria Cueva y la Directora del Conservatoriu Profesional de Música y Danza de Xixón Julia Álvarez González van inaugurar la xornada a les 10.30h. Darréu d’ello, a les 10.45h va arrancar el panel Innovación y tradición: enfoques educativos na enseñanza de la gaita nel que van intervenir tres ponentes: Flavio R. Benito con De la tradición al contextu educativu, Inés Estrada Vázquez falando sobre Los métodos d’enseñanza aplicaos a la gaita n’Asturies y el que fuera Catedráticu de Percusión del centru, Julio Sánchez-Andrade Fernández con La percusión como soporte pedagóxicu al estudiu de la gaita. L’espaciu va cuntar tamién con tiempu pal alderique.
De siguío, Francisco López Delgado, investigador nel Departamentu d’Historia del Arte y Musicoloxía de la Universidá d’Uviéu, va moderar la mesa redonda La gaita nes enseñances oficiales de música: pasáu, presente y futuru na que van participar l’Ex-xefe de Serviciu d’Enseñances Artístiques de l’alministración asturiana Roberto Menéndez del Campo, y los tres profesores que ponen clase del instrumentu anguaño nos conservatorios: Rodrigo F. Joglar, Jodi F. Boltá y Flavio R. Benito. La xornada va finar, dempués d’una posa breve, col conciertu de clausura nel que va tocar alumnáu de los tres niveles educativos oficiales (Elemental, Profesional y Superior). Pue topase más información. amás del programa completu, na páxina web del CONSMUPA.
Suscríbite a les nuestres novedaes
