Más de 950 actuaciones en 165 ayuntamientos del Estáu español qu’algamaron más de 67.000 espectadores. Esi ye’l balance de la segunda edición de Dinamiz-ARTj, un programa incluyíu na Red Cultural del Instituto para la Transición Justa (ITJ) que nació col enfotu de xenerar una ufierta cultural amplia nos conceyos que s’enmarquen dientro de les llamaes «zones de transición xusta», que son aquelles afectaes pol pieslle de mines de carbón y centrales térmiques o nucleares. La iniciativa xestionada pola Fundación Ciudad de la Energía (CIUDEN) entama una tercer edición na qu’hasta’l 31 de marzu puen inscribise artistes y ayuntamientos.
Tola información pa la participación ta nes bases del proyectu, qu’esti añu incorpora novedaes. Per un llau medra’l caché de los artistas en rellación a ediciones anteriores, que va tar ente los 420 € por una actuación d’un artista individual a los 2.100 € por actuación de grupos con cinco o más integrantes. No que cinca a los Ayuntamientos van valorase bien qu’existan propuestes conxuntes ente varios Conceyos, nun se llenda’l númberu d’espacios por cada conceyu y s’amplía’l calendariu d’actuaciones, que xube de siete a diez meses, incorporando asina la primavera.
Van poder participar compañíes, grupos y artistes individuales de música, danza o teatru y, ente los artistes, namás van incluyise nel catálogu los que polo menos la metá de los componentes seyan naturales o residentes de, nel casu d’Asturies, un total de veintisiete conceyos: seis nel suroccidente -Allande, Cangas, Degaña, Ibias, Salas, Tinéu-; catorce nel Valle del Caudal y Aboño -Ayer, Carreño, Corvera, Xixón, Gozón, Llanera, Mieres, Morcín, Quirós, La Ribera, Riosa, Teberga y Villaviciosa-; y siete nel Valle del Nalón -Bimenes, Casu, Llangréu, Llaviana, Piloña, Samartín del Rei Aurelio y Sobrescobiu-.
El pasáu añu n’Asturies programáronse 139 propuestes artístiques que recibieron 4.500 espectadores. D’ente tolos nomes que participaron en Dinamiz-ARTj, once taben venceyaos a la música n’asturianu o en gallego-asturianu: Alienda, Slum Suit, La Bonturné, Llau, Algaire, Héctor Braga, Caldo y Os Rabizos, Deira, Los Gascones, 6 Riales y Cerezal.
Nesti videu pue vese un resume del proyectu y ye na web de Dinamiz-ARTj onde los artistes y ayuntamientos interesaos en participar tienen que presentar les solicitudes online pa poder apuntase a la tercer edición d’esti programa enantes del 31 de marzu. Con esta novedosa iniciativa el Ministeriu pa la Transición Ecolóxica y el Retu Demográficu quier xenerar actividá a traviés d’un elementu dinamizador como ye la cultura; complementar la ufierta turística nos conceyos onde van desendolcase les actuaciones y favorecer l’intercambiu social con accesu gratuitu a les actividaes culturales. Amás, busca dinamizar los espacios escénicos llocales, especialmente aquellos bienes patrimoniales de calter minero-industrial, aumentando l’actividá que se desendolca nos mesmos.
Suscríbite a les nuestres novedaes
