Dende la creación a finales de 2023 de Llar, esti proyectu nun apara de puxar pola música tradicional. La siguiente actividá qu’entamen ye’l Llar Trad Fest, una ambiciosa iniciativa que va desendolvese del 28 de xunu al 1 de xunetu en La Pola Somiedo y qu’acueye masterclases pa dellos niveles d’habilidá, tres nueches de conciertos folk con grupos asturianos y internacionales, una nueche en danza, introducción a les sesiones de música folk, alderiques y meses redondes, un taller d’escanciáu de sidra y un programa infantil «enfotáu en despertar l’interés de los más mozos pola cultura y la música tradicional d’un xeitu llúdicu y divertíu, ayudando amás a la conciliación familiar durante l’eventu». Los abonos pa toles actividaes yá tán a la venta por 120 € na web del certame, onde ta tola información al completu.
«Fomentar el deprendizaxe y la promoción de les músiques tradicionales tanto asturianes como d’otros países del Arcu Atlánticu, poniendo especial procuru nel intercambiu intercultural, la creación de comunidaes y la tresmisión interxeneracional de conocimientos», esti ye l’oxetivu col que se presenta’l Llar Trad Fest, orixinal eventu qu’amesta’l formatu d’un campamentu musical pa toles edaes col d’un festival. D’esta manera va haber 30 profesores de seis países, que van compartir los sos conocimientos en diez especialidaes musicales: guitarra/bouzouki, vigulín, xiblata, whistles, gaites, percusión, bodhrán, acurdión, cantu y baille tradicional/pandereta, amás del programa pa la reciella. Ente’l profesoráu hai nomes destacaos como Michael McGoldrick (Reinu Xuníu/Irlanda), Jean-Michel Veillon (Bretaña), Anxo Lorenzo (Galicia), Pepín de Muñalén (Asturies), Xosé “Ambás” (Asturies), José Manuel Tejedor (Asturies), Xisco Feijoó (Galicia), Xel Pereda (Asturies), Liz Doherty (Irlanda), Josephine Marsh (Irlanda), Simon Bradley (Escocia) o Fin Moore (Escocia).
En cada xornada, dempués de les clases y de les otres actividaes complementaries, ye’l turnu de la música enriba los escenarios. El vienres 28 actúa un dúu formáu polos músicos asturianos Gonzalo Llao y Julio Rodríguez, Felpeyu y el gallegu Anxo Lorenzo. El sábadu 29 hai Nueche en Danza intercéltica cola participación de Xisco Feijoó, Cris Zagaleja, Xosé “Ambás” & Ramsés Ilesies, Pau Santirso & María Vázquez, Santi Galguera, Jean-Michel Veillon, Marie Le Goff & Alexandre Romieux. El domingu 30 les actuaciones tán protagonizaes por dúos o tríos qu’axunten a Josephine Marsh y Liz Doherty; a Jean-Michel Veillon y Xel Pereda; y a Simon Bradley, Borja Baragaño y Julio Rodríguez. Pa rematar la programación, el llunes 1 de xunetu toquen Fin Moore y Anna-Wendy Stevenson, Mike McGoldrick y José Manuel Tejedor Trio. Si dalguien tien interés en dir namás a los conciertos, la entrada ye a la voluntá y la donación pue facese a traviés de la páxina web del Llar Trad Fest.
Programación especial pa la reciella
Ente les otres actividaes nes qu’hai Slow Sessions -introducción a les sesiones de música folk-; alderiques y meses redondes y hasta un taller d’escanciáu de sidra; destaca sobre manera’l Llar Trad Fest Reciella, un programa infantil dirixíu por Mónica Acevedo, Janire Mañes, David Varela y Xosé Antón «Ambás» que cunta con actividaes estremaes formatives, llúdiques y impartíes n’asturianu, castellanu y inglés. Esto último ta en llinia col calter internacional y intercélticu d’esta iniciativa pionera n’Asturies que conecta la enseñanza, la promoción, la profesionalización y la internacionalización de la música tradicional y folk asturiana.
Suscríbite a les nuestres novedaes
