L’últimu númberu de ‘Lletres Asturianes’ publica un estudiu sobre la música asturiana depués del 2008
El recién publicáu númberu 127 de la revista Lletres Asturianes de l’Academia de la Llingua Asturiana inclúi ente los sos conteníos un interesante estudiu -n’inglés-, firmáu pola profesora Isabel Álvarez Sancho (Universidá del Estáu d’Oklahoma), tituláu «Nueva tradición y activismu en comunidaes de llingües minorizaes: La dómina de la música asturiana depués del 2008». Nél, según se recueye nel resume, analiza la recuperación de la tradición y les nueves formes d’activismu y texíu de rede comunitaries na música n’Asturies tres de la crisis financiera del 2008. Pa ello, l’autora trata los casos concretos de Rodrigo Cuevas, Ún de Grao y el Coru Al Altu la Lleva.
Señálase que la música sigue siendo ún de los vehículos principales nos que tolos habitantes d’Asturies -tamién d’aquellos que namás utilicen el castellanu na so vida cotidiana- s’espresen n’asturianu. Poro, la música asturiana, tien un papel únicu na creación de la identidá asturiana: fala a los individuos al tiempu que facilita los vínculos emocionales cola historia, col presente, coles canciones y los cantantes asturianos, y coles comunidaes internes y internacionales. P’Álvarez Sancho «Una de les tensiones más interesantes de la música asturiana tien que ver col so papel na preservación d’una tradición en llingua asturiana y, al empar, como vehículu de cambiu y activismu. Nes últimes décades, hebo una tendencia a crear una dicotomía dientro de la música asturiana que paez reflexar una división dientro de la identidá asturiana. Esta visión considera, per un llau, que la música “tradicional” ta venceyada a lo rural, a patrones inmutables y a persones mayores, mientres que la música “moderna”, como’l punk, el rock o incluso’l folk, vese en conexón con tribus más xóvenes, mayoritariamente urbanes, con ganes de desafiar lo establecío». Esta dicotomía, según lo espuesto pola profesora, tiende a desapaecer o, polo menos desdibuxase, cola apaición de nueves propuestes y artistes qu’entemecen tradición y anovación, ruralidá y urbanidá.
Otru de los aspectos más importantes de los que se traten ye que la música asturiana tamién puede crear dende la periferia y rellacionarse con diferentes espacios, asina ésta y, por estensión, la so llingua y la so cultura, pueden producir una rellación diferente col tiempu, qu’asitie a Asturies dientro de la tradición, y alcuentre nueves formes d’influyir nel presente y nel futuru. Una de les conclusiones fudamentales del estudiu sería que la música asturiana nueva rellaciónase intrínsecamente cola llingua y la identidá asturianes y, sobre too, da testimoniu d’una época, al tiempu qu’esplica les sos conexones cola tradición, col presente y les sos estructures de sentimientu, y coles diverses visiones de futuru. Les palabres finales rescamplen que los músicos asturianos «Al traviés del so usu de la tradición pal presente y el futuru, creen nueves formes de rellacionase cola identidá social y individual asturiana y demuestren la vitalidá de la llingua asturiana, la cultura y les sos concepciones del tiempu nun entornu cada vez más global».
L’artículu completu puede descargase nesti enllaz: http://www.academiadelallingua.com/lletresasturianes/pdf/1667217939New%20Tradition%20and%20Activism.pdf.
Na semeya, el Coru Antifacista Al Altu La Lleva.
