Mapi Quintana llanza’l videu del “Agarráu de María y Lucero”
El 30 de xunu asoleyaron Música pa tornar páxaros y La Maramoniz, los dos trabayos nuevos de Mapi Quintana dempués de 9 años. Agora l’artista anuncia que va dir asoleyando per YouTube los distintos videos qu’acompañen a caúna de les canciones que formen l’espectáculu de Música pa tornar páxaros. “Agarráu de María y Lucero” ye la segunda d’estes pieces realizaes por Marina Durany qu’asoleyen en YouTube, dempués de que’l pasáu 11 de mayu yá saliera “La Carta” a mou d’adelantu del trabayu.
Música pa tornar páxaros nació como obra escénica en 2022. Esi añu el Festival Intercélticu de Lorient -el más prestoxisu del mundu celta- dedicó la so edición a Asturies y el gobiernu asturianu encargó a Mapi Quintana la obra inaugural del festival. Asina nacieron estos 7 temes nos qu’hai influencies del jazz, la música impresionista y la tradicional asturiana. Una delicia pa los oyíos que va directamente al corazón, porque la emotividá enllena les lletres. Nelles fálase de memoria histórica, de persones queríes que yá nun tán equí… siempre col telón de fondu de Saíle, esi paxarín que fai alcordanza d’Elías García, compañeru musical de Quintana -y ún de los nomes más importantes del folk asturianu- que finó prematuramente en 2019.
Agora l’artista l.leniza continúa cola promoción d’esti álbum -que salió en dixital y en físicu con un formatu únicu-, asoleyando pasín a pasu estes pieces audiovisuales y acompañándoles cola desplicación de caúna d’elles. Del “Agarráu de María y Lucero” comenta lo que vien darréu:
«Güela, ¿cómo ye esa hestoria d’un día que te mandaron a les vaques y se te metió la niebla y llevóte el tu perrín hasta casa?
– Pero si yá te la conté un ciento veces…
– Ye igual, ye qu’encántame como me la cuentas.
Contómela toles veces que-y pedí que me la contara, un ciento más. Cuando güelita yá nun taba y quise escribir esti cantar, llamé a mio padre pa que me describiera’l camín que facía güelita cuando diba a les vaques de nena y cómo se llamaban los sitios. La Casa La Mina, El Val.lín, La Mata… prestó mucho sentir qu’hai polo menos un paisanu que sigue l.lamando a esos l.lugarinos pol so nome».
Marina Durany
Amás de les desplicaciones de l’autora, la realizadora audiovisual, Marina Durany, tamién va dir falando de caúna de les pieces nestos videos publicaos en YouTube. «Nesti videu apaecen cinco protagonistes de forma simbólica y mui desnuda. Les vaques cola so gayola, lo grande de la borrina que nun segundu pue facer que desapaezamos. El simpáticu Lucero, qu’en forma de títere ye l’héroe. Y la lluz de la güela de Mapi, María, una escultura perguapa de madera me recuerda a la imaxe d’una virxe, una virxe del campu. Ensin ella, nun esistiría esta historia que paez un cuentu máxicu infantil», desplica l’artista visual pa qu’asina tolos siguidores de Mapi Quintana puean afondar más en conocer la obra nueva d’esta compositora y intérprete.
