Del 23 al 25 de xunu va celebrase un nuevu eventu cultural n’Asturies, Viña y Obra. Alcuentru d’arte y vinu. El Parador de Courias, en Cangas del Narcea, va acoyer esti eventu qu’axunta lliteratura, música, artes plástiques, arqueoloxía y danza alredor de la denominación d’orixe del vinu de Cangas. La música tradicional va tar presente con dos actuaciones: la d’Ambás ya Ramsés el domingu 25 y la de la formación de músiques tradicionales ibériques El Naán el sábadu 24.
El patiu del Ayuntamientu de Cangas va acoyer el domingu 25 a les 18h el conciertu-taller Danza del vinu. Nél, los músicos y investigadores Ambás ya Ramsés van interpretar cantares de raigañu a ritmu de percusiones tradicionales como la pandereta, el panderu o’l tambor. Amás, la so actuación va tar acompaña d’una degustación de vinos de la Bodega Las Danzas.
Per otru llau, la música tradicional d’0tros pueblos ibéricos tamién va sonar gracies a l’actuación d’El Naán en formatu dúu. Los músicos palentinos Héctor Castrillejo & Carlos Herrero van dar el recital poético-musical La desaparición de las luciérnagas nel qu’interpreten composiciones propies y tradicionales amestaes a poemes que falen de la cultura campesina, los oficios y la tierra. La cita ye’l sábadu 24 a les 20.30h nel Parador de Courias.
Gratuidá y orixinalidá
«L’aliendu de les uves tópase nel orixe de dances, cantares, bodegones, mitos y poemos, por eso, esti programa nel que cates y degustaciones van acompañar a les distintes artes, en conversación cola tierra y la tradición». Con estes palabres despliquen la filosofía del eventu dende Artesavia, empresa organizadora d’estes xornaes que cunten cola collaboración de la Conseyería de Cultura, Política Llinguística y Turismu del Principáu d’Asturies, l’Ayuntamientu de Cangas, la D.O.P Cangas y les bodegues Monasterio de Corias, Vidas y Las Danzas. El programa completu pue vese na web d’estes orixinales y gratuites xornaes qu’axunten con xeitu la cultura del vinu xunto con otres artes.
Suscríbite a les nuestres novedaes
