Mapi Quintana publica “La Carta”, l’adelantu de ‘Música Pa Tornar Páxaros’
Nes próximes selmanes van asoleyar los dos trabayos discográficos nuevos de Mapi Quintana: La Maramoniz y Música Pa Tornar Páxaros. Tres de llanzar los adelantos del primer proyectu –“Agarráu de La Maramoniz” y “Zagaleja“-, presenta agora’l single del segundu: “La carta“. Esti cantar ta dedicáu a Luis Álvarez Tuñón, bisgüelu de Mapi Quintana, y sal güei porque se cumplen 85 años del so fusilamientu tres d’una acusación falsa. La pieza audiovisual que lu acampaña ta realizada por Marina Durany, diseñadora del álbum.
«Yera l’ añu 38. Nun sé si yera febreru o marzu cuando metieron a Luis Álvarez Tuñón, mio bisgüelu, na cárcel d’Uviéu acusáu falsamente de roba-yos los zapatos a unos prisioneros de los que taba al cargu. Dempués d’un xuiciu completamente irregular, como tolos que facíen los franquistes, foi condenáu a muerte. L’once de mayu del 38 fusiláronlu y tiráronlu na fuesa común d’Uviéu. Colos años supimos que-y concedieren l’indultu, pero dalguien retuvo esa carta col documentu en Campumanes y nun llegó a tiempu pa evitar la so execución. Nun llegó la carta que funde barrotes. Nun llegó la carta que para les bales», desplica Mapi Quintana pa presentar esti emotivu cantar.
Música Pa Tornar Páxaros ye’l discu que recueye la obra que’l gobiernu asturianu encargó a esta artista l.leniza pa representar a Asturies na 51 edición del Festival Intercélticu de Lorient. Llueu d’algamar l’oxetivu de financiación na plataforma Verkami, esti discu y el de La Maramoniz van ser una realidá. Los trabayos van asoleyar ente finales de mayu y primeros de xunu, y van tar acompañaos de dos conciertos de presentación, ún pa cada álbum: Música Pa Tornar Páxaros el 9 de xunu nel Niemeyer d’Avilés y La Maramoniz el 17 de xunu Teatru Vital Aza de La Pola (L.lena).
