A principiu d’esti sieglu XXI el rock en llingua asturiana esperimentaba un xorrecer como nunca enantes, produciéndose una pequeña escena con bandes nueves que garraben el testigu de clásicos como Dixebra o Los Berrones, a los qu’habría qu’añader a Avientu.
Con componentes ventiañeros surdieron daquella formaciones como Güerku, Milicia Astur, Oi! N’Ast, La Tarrancha, Skama la Rede o Skontra. Estes tres últimes diber ser les que llograríen caltenese nel tiempu y entamar una carrera sólida, pero pel camín diben quedar otres de vida curtia; foi’l casu de Falkatrúa.
Estos últimos creárense en Xixón nel branu del 2001 cola idea de facer punk-rock n’asturianu. Taben comandaos por Pitxe, una cantante con carisma y actitú que depués diba facer parte d’otros proyectos como Skontra o The Cilúrnigans. Nesi mesmu añu Falkatrúa diba grabar una maqueta casera conteniendo seis temes propios y una versión del cantar ‘Aida de la Fuente’. Con un soníu aceptable amosaben les característiques propies del so estilu: un rock de base punk, con pingarates de reggae y folk, proporcionaes estes pola gaita y el tin whistle. Temáticamente les lletres trataben cuestiones de calter social, ecoloxista o políticu, con procuru pol modelu llingüísticu y un discursu directu y combativu.
Nel añu 2004 diben facer parte del discu compilatoriu tituláu Rock’n’llingua aportando dos temes; foi aquel un trabayu que dio carta de naturaleza a esta escena de Rock Astur y valió pa presentala públicamente. Depués de varios conciertos, les circunstancies vitales de los miembros de Falkatrúa diben facer inviable la permanencia de la banda y desapaecería pocos años depués de la so creación.
Suscríbite a les nuestres novedaes
