Ayeri arrancó una nueva edición del Festival Internacional do Mundo Celta de Ortigueira, l’eventu más importante del xéneru na península ibérica. Como ye vezu, tolos años hai presencia asturiana y nesta ocasión van actuar seis artistes y agrupaciones: José Manuel Tejedor, La Banda Latira, Entós, Pandereteros d’Anguaño Grupu Folclóricu Prau Llerón y la Banda Gaites Castrillón. Amás, va haber un taller de baille asturianu.
La representación asturiana entama esti xueves 10 cola Banda Gaites Castrillón (17h), Prau Llerón (20h) y el tríu folk de cámara Entós, que van tocar nel escenariu Vila Celta dientro del concursu Runas a les 20.30h. El vienres 11 a les doce la mañana actúen la formación asturbretona La Banda Latira que, lo mesmo que la BG Castrillón y Prau Llerón, van facer delles actuaciones a lo llargo’l festival. Pandereteros d’Anguaño actúen el vienres a les 20.30h na Vila Celta. Tamién el grupu folclóricu mierense va poner un taller de baille asturianu el sábadu 12 a les cuatro la tarde.
La presencia d’artistes y agrupaciones del país remata’l domingu 13 col conciertu de José Manuel Tejedor nel Escenario Estrella Galicia. Zárrase asina la representación de la música’l país dientro d’esti festival que se celebra dende 1978 n’Ortigueira y que peles sos últimes ediciones pasaron más de 100.000 persones.
Suscríbite a les nuestres novedaes
