Maqueta inédita del tercer discu de Balandrán (2001)

El documentu sonoru qu’asoleyamos agora nel AMCA trátase de la maqueta que grabaron nel añu 2001 y na que se contenía parte del repertoriu que diba incluyise nel so tercer discu. Con un soníu mui bonu, siguíen afondando nel so estilu particular, con arreglos novedosos y la combinación de composiciones propies o inspiraes en pieces de calter tradicional, amás de tres cantares (dos n’asturianu y unu en gallego-asturianu).

Balandrán foi ún de los grupos más importantes de la segunda fola del folk asturianu, aquella que surdió ente finales de los 80 y principios de los 90 del sieglu pasáu. Concretamente, esta banda avilesina -el nome gárrenlu de la playa de Samalandrán- naz nel añu 1987 formada por músicos provenientes d’escenes distintes: jazz, clásica, tradicional, pop, rock… El so enfotu dende’l primer momentu foi’l d’anovar el soníu folk asturianu, yá na instrumentación dexaben claru esti espíritu con respectu al calter acústicu de la mayoría de les formaciones d’aquella dómina; d’ésta facíen parte la gaita, el violín, la flauta, l’acordión o la guitarra acústica, pero tamién la batería, el baxu, los teclaos o la guitarra eléctrica. Otru elementu definitoriu del so soníu foron les composiciones propies y la llibertá arreglística, dando como resultáu un estilu eclécticu y orixinal. Supieron crear una nueva música asturiana, híbrida ente lo trad y lo contemporáneo, ente lo rural y lo urbano, ente lo acústico y lo eléctrico. Foron tamién, amás, introductores nel folk del país de les sonoridaes electróniques, contando con dos voces nes pieces cantaes (Javi Rodríguez y Tina Cuadriello). 

Depués de grabar una maqueta col componente de Beleño Fernando Largo, nel estudiu caseru que tenía asitiáu en Trevías (Valdés), y de llegar a rexistrar un álbum con esti mesmu músicu yá nel estudiu qu’abriría n’Uviéu, que nunca vería la lluz, publicaríen el so primer discu, de títulu homónimu (Balandrán, L’Aguañaz 1993), col que se daríen a conocer más ampliamente y percorreríen el circuitu de Nueches Celtes tan espardíes daquella. Tres años más tarde apaecería’l so segundu trabayu, tituláu El Viaxe (L’Aguañaz 1996), col que llogren el reconocimientu unánime de públicu y crítica. De fechura impecable, estes dos muestres del llabor de Balandrán confírmenlu como un grupu d’una elegancia musical indiscutible y de lo meyor que dio la música d’espresión asturiana.

El documentu sonoru qu’asoleyamos agora nel AMCA trátase de la maqueta que grabaron nel añu 2001 y na que se contenía parte del repertoriu que diba incluyise nel so tercer discu. Concretamente son siete cortes: 

1. Amiestu de temes tradicionales ensin títulu.
2. Danza d’Avilés.
3. Deva.
4. Fahrenheit.
5. Danza de Santana.
6. Viesques.
7. Arde o eixe.

Con un soníu mui bonu, siguíen afondando nel so estilu particular, con arreglos novedosos y la combinación de composiciones propies o inspiraes en pieces de calter tradicional, amás de tres cantares (dos n’asturianu y unu en gallego-asturianu). Tando nesti procesu de preparación d’esi tercer álbum, Balandrán decide disolvese ensin llegar a rexistralu; namás una de les pieces incluyíes nesta maqueta («Danza d’Avilés») apaecería nun discu (10 Años d’Independencia, L’Aguañaz 2003), tando les demás inédites. Desapaecía asina una de les formaciones más orixinales y innovadores que dio la música asturiana modernamente.

// CALCA EQUÍ PA SENTIR LA MAQUETA INÉDITA DE BALANDRÁN //