Dempués d’asoleyar dellos singles a lo llargo l’añu pasáu, el grupu folk Alienda yá tien rematada la grabación del so primer discu de llarga duración. La so intención ye asoleyalu a finales d’abril y pa ello tán acabante d’entamar una campaña de crowdfunding en Verkami cola que financiar los 3.300 euros que necesiten. Hai delles recompenses con unos precios que van dende 1 euro hasta 35 euros y qu’inclúin el discu y merchandising variáu.
Asina presenta’l grupu’l crowdfunding: «Somos un grupu asturianu de música power folk nomáu Alienda qu’entamó la so andadura nel añu 2013. Al añu siguiente asoleyamos el nuesu primer trabayu d’estudiu, l’EP Alendando, con cuatro temes representativos del grupu. Ye agora, en 2023, cuando queremos sacar el primer discu de llarga duración: Alienda.
El grupu ta formáu por seis componentes: Bárbara González-Quevedo Pedrayes al vigulín y la voz, Illán Escalada Martínez a la gaita y la voz, Francisco Rodríguez Buznego al bouzouki, Edu Llosa García a la batería y percusión, Carlos Castro Vázquez al baxu y Emilio Amboage Rodríguez a la guitarra.
Participando nesta campaña vas ayudanos a financiar los gastos d’edición y impresión del discu y del merchandising, así como preparar la presentación.
El discu foi grabáu na segunda mitá del añu 2022 en Tutu Estudios. El diseñu del discu y del merchandising ta fechu por Alicia Posada. Les semeyes del discu y de la campaña son d’Aida Alonso».
Suscríbite a les nuestres novedaes
