Nos primeros años de la década de los 90 produzse n’Asturies un españíu de bandes folk, de les que faen parte músicos permozos, que xuben a la fola que se taba produciendo dende los años anteriores. Naz asina la segunda xeneración de formaciones d’esti estilu, que taba encabezada por Balandrán, Cambaral y Felpeyu como nomes destacaos, recoyendo’l bagaxe de bandes históriques como Trasgu, Beleño, Llan de Cubel o Ubiña.
Naquel momentu les llamaes Nueches Celtes taben nun procesu d’espardimientu bien grande, con cites qu’abarcaben la práctica totalidá de la xeografía asturiana. Nelles, les nueves formaciones tienen la oportunidá de curtise y conectar con un públicu numberosu que naguaba por sentir en directo estos soníos.
Una d’aquelles bandes foi la xixonesa llamada Andurrial, activa ente los años 1991-1997. El so estilu adscríbese a la corriente acústica, mayoritaria nel folk llariegu daquella, combinando la reellaboración de pieces tradicionales con otres de composición propia. De la formación fixeron parte en dalgún momentu: Efrén Vigil (percusión, flauta dulce, tin whistle), Marco Antonio Vigil (acordión cromática), Víctor Álvarez (gaita), Noelia Vigil (percusión), Fernando González (guitarra acústica), Carlos Ibias (flauta travesera, tin whistle), Raúl Luis (guitarra acústica y buzuqui) y Covadonga Carbayo (acordión y vigulín).
Les dos maquetes qu’incorporamos al Archivu de la Música Contemporánea Asturiana (AMCA) son de los años 1992 y 1993, incluyendo un total de diez pieces nes que l’acusticidá ye la norma, destacando’l soníu de la flauta en melodíes bien trabayaes y un acompañamientu solvente. La primera ta fecha de manera artesanal y foi la so carta de presentación na escena folk del país, de la segunda publicáronse unos pocos exemplares al traviés de Grabaciones Pola.
Suscríbite a les nuestres novedaes
