Yá ta en toles plataformes musicales ‘tiempu !’, el tercer y últimu adelantu del que va ser próximu EP de Ferla Megía, Páxaros 02. Trátase d’una pieza de 3 minutos y 21 segundos na qu’esti xoven músicu sierense repasa una montonera d’estilos musicales que van del rap al ambient, pasando pel dembow, el pop, o a la electrónica más cañera; un reflexu de la versatilidá musical d’esti artista.
«Musicalmente debe de ser el cantar del que más arguyosu toi. Tien pila referencies estremaes, pila estilos y vibras…», desplica Megía al rodiu d’un tema que fala de que «trabayando nunca se tien tiempu pa disfrutar de les pasiones y de la to xente». «Como diz el sampleo a metá del cantar -que por cierto ye un sample que saqué de Mochileros TPA– ‘Llenar los años de vida y non la vida d’años'».
El siguiente pasu de Megía ye publicar Páxaros 02 el 4 d’avientu, un EP que «musicalmente sigue garrando influencies de tolos estilos posibles» que pasen pel «filtru» d’esti músicu qu’amesta soníos de la música electrónica, urbana, tradicional, pop y de la canción d’autor. L’avance d’él pue sentise nos singles yá publicaos enantes: ‘Conseyu‘ y ‘Redobla‘.
El próximu EP naz de seis temes que nun entraron por llargor nel EP Páxaros 01, va tener les collaboraciones de Tania Pereira, Rita Ojanguren y basa ún de los temes n’otru de Viva Belgrado. «Anque yeren canciones de primeres inconexes, llueu decatéme qu’había un puntu d’alcuentru: les referencies al monte, a los mios collacios, a los momentos fugaces, a los alcordances, a la frustación… y en definitiva a metáfores que munches veces facíen referencies a páxaros o a la fauna llocal«, añade Ferla Megía sobre esti trabayu del que’l próximu 27 de payares va poder sentise un tercer single.
Suscríbite a les nuestres novedaes
